،’ جاعت عيوني شوفتك ياعنيدهـــ ،’ ][سعيد بن مانع][

[العنيدهـــــ]

انا وش اللي بغيبتـك مستفيـدهـ ؟
صدري وصل .. الهم حد الشباعه

الصبح يضحك لي بضحكه جديـدهـ ,
وانا الى هالحين مانمـت ساعـه

اسهر واسامر كل نجمـه فريـدهـ
وان نمت ؟ قالت ليه هذي القطاعه

ياغايبه والليـل لا قويـت ايـدهـ ؟
يدي ضعيفـه ماتقـاوي صراعـه

الحـب دمٍ والمواصـل وريــدهـ
والقلب هو اللـي يزيـد اندفاعـه

غبتي وسميتـك : قريبـه بعيـدهـ
والعين تحسد خافقـي عالقناعـه

جاعت عيوني شوفتـك ياعنيـدهـ
ماترحمين اللي بلتـه المجاعـه ؟

بينـي واحزانـي علاقـه وطيـدهـ
مثل العلاقه بين عقـرب وساعـه .,

فراقـك الله يمحـقـه لا يعـيـدهـ
لازاد زاد الجـرح معـه اتساعـه ..

نسياني اكذب من كـلام الجريـدهـ
وكتماني اعتم من عتام الإشاعـه.,

وأشواقي اصدق من فعايل رفيـدهـ
وأبلغ من طعون اليدين الشجاعـه ..

شوقٍ هبا في القلب وسم الحديـدهـ
والقلب لولا الصدر ؟ تم انتزاعـه

ولاجـداي الا حـروف القصيـدهـ
عسى تزودنـي شويـة مناعـه .,

لك الله اصبر عالريـاح الشديـدهـ
يالمركب اللي ضاع منه شراعـه ..

عسى الفرج يقبل ويهنـاك عيـدهـ
وتبات عين اللي شقا البُعد لاعـه .,

وأقول للنجمـات فرصـه سعيـدهـ
والمعذره دامي نويـت القطاعـه ..

ياغايبـه والنخـل يبّـس جريـدهـ
ولا يغـرك راسهـا وارتفـاعـه .,

به في غيابك فايدهـ بـس وحيـدهـ
يمكن إنها هي العـزا والشفاعـه

تدرين وش في غيبتك مستفيـدهـ ؟
اني اصلي الفجر ويـا الجماعـه.....





[youtube]http://www.youtube.com/watch?v=FEj2Pev9lEw[/youtube]

[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]

 

 

 

 

 

 

 

 

---

التعديل الأخير تم بواسطة العنيدهـــــ ; 11-25-2011 الساعة 07:50 AM