إحساس شاعر

[الطير الرحال]

يالله يالي بقدرتك ترزق الناس
تشفي جروح الي جروحه عنيده
سر ياقلم واكتب على كل قرطاس
إحساس شاعر ساكنٍ في وريده
وارسل معاناته الى ساير الناس
من فكر شاعر تصطلي به وقيده
بعض البشر في رفقته ترفع الرأس
نظيف قلب وله صفات حميده
الصاحب الي صحبته دوم نوماس
ليا نخيته بالليال الشديده
يفز فزة اشقر الريش قرناس
ليا كفخ يم القطاة الشريده
وبعض البشر يمشي على درب الانجاس
اهل الفعول الخايبه والبليده
يا شين رجلٍ في قفا الناس عساس
يمشي على درب الحسد والنقيده
لا خير في رجلٍ كذوب وهلاس
عاله على ربعه ولا احدٍ يريده
هاض الخفوق وشوش الفكر وانحاس
وابدعتها وحبكتها في قصيده
وختامها صلو على سيد الناس
عد الجبال الشاهقات المديده
الي بعث بالحق قدوة ونبراس
راع الصفات النادرات الفريده

وسلامتكم ولكم مني كل الحب والاحترام . نصائحكم دعم لي وتوجيهاتكم طريقي الى الابداع وانتقاداتكم سلاحي وعتادي فلا تبخلون علي بارائكم ودمتم بخير ...