|
|
 |
 |
 |
منذ /03-19-2011, 07:11 PM
|
#1 | |||||||||
|
رد: شرح قصيدة العقاب للشاعر محمد بن فطيس
السلااااااااااااااااااام عليكم ورحمة الله وبركاته يمسيكم بالخير يا الربع بيض الله ويهك على الإبداع و على الفن والذوق في تفسير الابيات و بيض الله ويهك دنيا وآخره بسبب الاختيار الراقي لهاي القصيدة اللي يصد عنها الكثير لقلة فهمهم لها و انا بصراحة اعتبرها معلقة بكل ما تحمله الكلمة من معنى والله انها قصيدة تدرّس من إبداعاتها و انا بصراحة على قولة البدو يوعان كلام و من زمااان ادور حد اتكلم معاه بس عن بن فطيس الأسطورة و أعجوبة شعر هذا الزمان واللي تفوق به على الأزمان السابقة وهاي أول مشاركة لي اتشرف يها معاكم و اتمنى تدوم المشاركات و انا بصراحة اشتركت خصوووووصا عشان اشاركك بعد ما شفت إبداعك فهالموضوع يا العقااااااب : آآآآآآه بس يا هالقصيدة كم تغنيت بها و كم وسّعت صدري و كم ونستني و كم خاوتني فسيارتي و السي دي الغالي اللي هي فيه انا اعتبر ان لكل قصيدة "بيت قصيد" لكن هالقصيدة لها أكثر من بيت قصيد و السبب كله علوّ كعب بو حمد و تفننه و روعته والشاهد الله و طبعا اخوكم ترا شاعر – و متأثر جدا جدا بفن بوحمد السهل الممتنع اللي ما يقدر يجيبه لا احد قبله ولا بعده عالعموم انا لو بابدأ اتكلم عن تأثّري و إعجابي بمحمد بن فطيس المرّي أكيد اني راح اطوّل و ازعجكم "مثل ما يقولون ربعي " دايما يقولون ياخي انته كرّهتنا الشعر و الشعراء من كثر ما تعد لبن فطيس و كثر ما تتكلم عنه عالعموم مرة ثانية ههههههه الله لا يهيتك يا اخوي انا عندي كمن ملاحظة و بالتأكدي تراني استفدت من موضوعك الرائع و استنتجت منه الكثير و ترا والله ان بن فطيس قصيده ما ينمل و اخوكم كل ما يسمع قصيدة و الله احس اني اول مرة اسمعها و اتعلم منهاو باذن الله راح نسمعكم لاحقا بعض من محاولاتنا لمجاراة الأسطورة بن فطيس انا ملاحظاتي على بعض الابيات : يوم يقول : ما لختالي علي حجة وانا سلة ودلة انا اعتقد انه قصده البراءة و الحب العذري بينه وبين محبوبه و الدليل أنه لو يحاول أي حد يختل "يعني يتجسس أول يدور عليهم عذاريب" أنه راح يفشل ولا رح يحصل عليهم أي حجة غير جلوسهم و حبهم العذري و سلتهم للطعام و دلة القهوة دليل البداوة و البراءة و النخوة البدوية اللي تبتعد عن كل منقود . يوم يقول : بين كفوف ملّه انا اعتقد انه يقصد بالمَـلة : الإناء - حيث ان الميم مفتوحة ومب مكسورة بمعنى الاهل أو الجماعة والطائفة يوم يقول : خايفن ما الله يتمم واعرف ان فلان عله أحسنت وانا اتفق وياك انه العذول يوم يقول : قلت ما تدري و انا الداري بعاقبة التماني اللــــــــــــــــــــــــــــــــــــــه الله الله الله الله على هالبيت يا ناس يقشعرّ جسدي كل ما سمعت ولا قريت هالبيت ياناس شوفوا الإبداع و شوفوا كيف اختصر محادثة كااااااااااااااملة بينه وبين محبوبه بمجرد شطر بيت انااعتقد انه يقول : في المحادثة بينه وبين حبيبه هو كان يطمّن حبيبه و يقوله : ياخي انته ما تعلم الغيب و ماتدري شو بيكون نصيبنا و لازم تتفاءل - - - - لكن في نفس الوقت يقول : (وانا الدّاري بعاقبة التماني) يعني انا بس اقوله ماتدري شو بيصير و يمكن يكون خير بالرغم من أني انا شخصيا عارف و داري و فاهم وش عاقبتنا و وش بيصير  هالبيت هو بيت القصيد مع اكثر من بيت آخر منها : وراحت سنين التلاقي – قلتها ما قصدي انه يقال صح الله لساني و الكثير الكثير من الابيات الرائعة يوم يقول : بس لا تشره عليّ لو لبّسوني غصب حلّة : انا اعتقد و اختلف وياك فالرأي بأنه كان يقصد ان حبيبه قالّه : أنا أعطيك وعدي و حبي و عهدي اني ما أخونك لكن لا تلومني لو زوّجوني بالغصب و لبّسوني حلّة الزواج و الحلة يقصد بها لباس العرس و مب الكفن يوم يقول : مادرى عن حبنا الا ظل محبوبه وظله انا اعتقد واختلف وياك فالرأي بعد و اشوف انه قصده يقول : انه محَد كان معاهم ومحَد شهد على حديثهم وعهدهم الا الظل والشجرة و محبوبه وبس وهالكلام دايما تستخدمه الناس مجازيا مثل لمّا حد يبا يقول انه وحيد و لا حد قعد معاه يكلّمه يقوم يقولك : والله كنت قاعد ومحَد كلّمني الا هالكنبة أو هالصخرة و من هذا القبيل يعني يقصد انه يقول انا اجتمعنا انا ومحبوبي و تعاهدنا و تصافينا و افترقنا و مضى بنا الزمن و عهدنا ذكراه من مكانه و من الشجرة والظلّ و هذا طبعا رأيي المتواضع اللي يمكن يكون غلطان عالعموم القصيدة ترا موسوعة علوم و فهم و عبارات و إيحاءات و فن و ذوق و روعة و أسلوب و جمال و إحساس و أكيد شعر عااااالي الكعب و رفيع المستوى و راقي جدا جدا جدا و انا بس حبيت اعلّق على موضوعك و بدرجة أكبر على ذوقك فالاختيار لهاي القصيدة الموسوعة و العذر و السموحة منك على ملاحظاتي و اتمنى انها تنال القبول و طبعا الاختلاف فالرأي لا يفسد لولد قضية خصوصا عند متذوق للشعر مثلك وشرواك واتمنى اتشرف بردك و تجاوبك و السموحة
|
|||||||||
|
 |
 |
 |
«
الموضوع السابق
|
الموضوع التالي
»
| الذين يشاهدون محتوى الموضوع الآن : 1 ( الأعضاء 0 والزوار 1) | |
العرض المتطور
|
|
الساعة الآن 11:55 PM
