#شعر ( #احمد_الناصر_الشايع )

[سااهر]

.
.

#قصيدة #الصاحب_الغالي
..
.

الا ياونتاه اللي من الفرقا برت حالي

كما بري الدبا الغصن الوريق اللي على حله

على اللي من ثلاث سنين هو همي وغربالي

ولكن ماحصل لي منه ساعةٍ تبري العلة

إلى مني بغيته في محله ماتهيالي

وإلا منه بغى ياصل محلي صار به ذلة

انا وياه مثل اللي ورد مطوية الجالي

طوى حاله ظماه ويصف الماء له ولا دله

إلى منه نطحني قال ياستار الأحوالي

عجب لله كيف الخل مايشفق على خله

وانا اركض طول ليلي مع نهاري فالخلا الخالي

أصايد رغبته واتبع طريقه واتبين له

إلين اصبحت انا المطلوب بالأول وبالتالي

انا المطلوب والطلاب راع القذلة الهلة

إلى مني بغيت انساه وادله عن هوى بالي

بلاي النفس ماهي من صخيّف الروح منحلة

كذوب اللي يقول اقوى فراق الصاحب الغالي

متى ماغاب عنك اللي توده بانت الخلة

إلى مني قطعت حبال وصله قام يبرالي

لحظني بالعيون اللي بها سيف الهوى سله

يطيح اللي بكفي وأذهل الدنيا وهو سالي

واعوّد في عماي الاول اللي مابه اشكله

ولاني قاعدٍ ارجي متى يرمي به الفالي

وانا ماودي العدوان تدري به وتفطن له

-

أحمد الناصر الشايع

.