مبطي وانا اعيش الشقا واسهر الليل

فاحت نفوح الحزن مع فوحة الهيل=وامسيت اردّد حرفك اللي شجاني
شفّيت لي جرح السّهر والمواويل=صوتك على لحن المآسي دعاني
حرفك سرى بالروح يجري كما الغيل=غرّب هجوسي واستحلّ المحاني
وش عاد .. يا (متعب) عذيب المناهيل=وش عاد .. لو طابق على الجرح ثاني ؟!!
اسرج عوادي هاجسك والفكر خيل=على بساط الرّيح فوق المباني
وانس الهموم وهرجة القال والقيل=تلقى السعاده والفرح والتهاني
خَلّك مثل ما كنت قبل المداويل=سالي ، ولا يغريك لحن الغواني
أمّا أنا .. ما في حياتي تفاصيل=الّا ندايب من طعون السناني
ما عاد تزعلني صروف التحاويل=ولا عاد تجرحني سهوم الهواني