محاوره بيني وبين الشاعر بخيت السناني

[عبدالله السناني]

هذي محاوره بيني وبين الشاعر بخيت السناني ليلة البارحه
.. لعل الله يشفيه عاجلاً غير أجل
ــــــــــــــــــــــــــــــــــــــــــــــــــ ــــ
بخيت السناني
سلام ردية وفاء بالليل ماهو بالنهار ** لكنها مثل القمر وسط الظلام مولعه
يقول من مر المداين ماسمع صوت الحوار ** اللي يقولون العصر يقرع وكلاً يسمعه


عبدالله السناني
يامرحبا ترحيب ياصل بيت بيت ودار دار ** واللي على سطح القمر لابدنا مانطلعه
ان كان مريت المداين عجل وعطنا القرار ** وان كان مامريتها هرج العرب لاتتبعه


بخيت السناني
دام البقاء واللي يطالع فاليمين وفاليسار ** يلقى كلام الناس عكس الحاجه المتوقعه
هذي حقيقه حطها عندك بعين الاعتبار ** انا اتكلم من حقايق والحقايق مقنعه


عبدالله السناني
تبغى الصحيح اني سمعت علوم واجريت اختبار ** مير النتايج جاتني عكسيه ومتفرقعه
مره نقول ان الهدف مضمون من عند العيار ** ومره نقول ان الهدف صعبن ولابه منفعه


بخيت السناني
مايحذفون الشجره الا اللي يحبون الثمار ** المثمر الله يمّنه والثاني الله يقلعه
ماحر من دمع اليتاما غير دمع الانتظار ** ياما انتظرنا نلتفت بالطايرات المقلعه


عبدالله السناني
تبقى الرجال رجال مذكوره مع طوال العمار ** واللي يدور نهاية الرحله يعود لمرجعه
ياما صبرنا لاكن الاوضاع من خلف الستار ** نعلم عن الظاهر ونجهل ويش خلف الاقنعه


بخيت السناني
الجو متعكر ويازين المطر عقب الغبار ** والغيث رحمه شامله للدار والعجه معه
ياصاحبي ماكل صاحب دقن يعرف قندهار ** لكن يلقى العلم عن اصحابه المتطوعه


عبدالله السناني
البرق يبرق شرق والمزنه على هاك الديار ** مزنه قويه والوكاد ان الديار مربعه
هذي حقيقه واعتبر ياصاحبي ماصار صار ** راضي بها راضي بها بالضيق ولا بالسعه

 

 

 

 

 

 

 

 

توقيع : عبدالله السناني

لاذكرتك جات بين العقل والخافق حرابه ** انت والخافق وعقلي كلكم ضد => السناني.؟ حسابي في تويتر ~> تُسعدني مُتابعتكم [فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]

[فهد جاسم]

كلام كبير

والصراحه المعنى مدفون يحتمل اكثر من وجه


صح الله لسانك ولسان بخيت اللي نتمنى انه يرجع للميدان

شكرا لك

[مجازفف]

هلا ياعبدالله ..
بخيت من فحول القلطه .... الله يشافيه ....

-
-
لاهنت ..

[عتيبي نجد]

صح السنتكم

والله يشفي بخيت السناني

يعطيك العافية

[عبدالله السناني]

يعطيكم العافيه على المرور , لآهنتم وصحت ابدانكم

[ماجد الشيباني]

صح لسانك ولسانه

واشكرك على هــ الكلام الجزل

تحياتي

[الماسـه]

صح لسآانك عبدالله وصح لسآنه بخيت
محآوره رآائعه
والله يشفي بخيت ويحفظه لأهله ومحبيه

شكرا خيوو الله يحفظك يآارب

[محمد الشريف]

يبو عابد انت راس حربه مافيها كلام صح الله لسانك وصح كلك وصح لسان رفيقك شاعر قوي
وربي اعجبني الفتل والنقض محاوره ذات معنى وذات صلافه حاجزيه

[عبدالله السناني]

اشكركم جميعاً على المرور

والله يعطيكم العافيه

(محمد الشريف )

دور لنا فرصه ثانيه , تراني فاضي هالاسبوع

[محمد الوايلي]

الله اما آآآآآآآآآآآمين

صح الله لسانك ياعبدالله ولسان بخيت

شهادتي فيكم مجروووحه

لاهنتووووووووا