كَانَّهَا الْفـــــرَقـى طَلَبْتــك حـآُجَتَين لِاتُعَلِّمــنِي وُلَاتَكــذَب عَلَي !

[تـَـــَرفَ]

غاب نور الحكايا بالوجيه وسرحت
.......................... وانت مسرى على رجل المعذب طويل

ليتني قبل لا اقفي عن عيونك سمحت
.......................... هاك دمعي على كف الوداع النحيل

اعتبرني مدينه جيتها واسترحت
......................... قبل تملا عيونك بالسحاب وتسيل

اعتبرني دموع ٍ في عيونك وسحت
......................... واعظم الجود دمعه من عيون البخيل

كنت صادق ولكن ليه منك انجرحت
......................... اتعب الكون صمتك لا تصد وتخيل

ذاك دربي يطول وكل ما امشيه طحت
......................... حسبي الله على طعونك ونعم الوكيل

بعد ما صرت تملك كل ما فيّ رحت
......................... مال ظل الغرام وحان رد الجميل

قبل لا اشرب ودادك في ضلوعي نزحت
......................... عذرك ابرد من النسمه بجو ٍ عليل

تصفر الريح غربه في غصونك و بحت
.......................... عيش عمرك مسافه بين صبح ٍ وليل

ضعت مدري انا اللي ضقت والا فرحت
......................... كان باقي تحت جذع الاماني مقيل

لو يمر الحنين الصب حين اتضحت
.......................... بين عوج الضلوع وبين طلع النخيل

اشبع الحزن صوتي كل ما مّل نحت
.......................... وانت تاخذ وتركيني على المستحيل

كم عشاني خطيت وكم عشانك دمحت
.......................... لو تجف المدامع ما يبور الهزيل

تدري اني عطيتك روح لكن مسحت
.......................... كل ذكرى تشدك للرجوع وتميل

رح سترتك سنين وبالوداع انفضحت
........................... شف تلمس ضلوعي باقي ٍ إلك نزيل

وكان رمشك يسولف للندى وش لمحت
........................... عط كيانك مجال يشوف دمع الاصيل

دام صدري اناء وفي غرامك نضحت
........................... ما بقي في قوي العزم للصمت حيل

بس ابسأل امانه .!! قبل تقفي صفحت .؟
........................... خايف اني مقصر وانت عابر سبيل