خضع لي غصن قيفان المعاني وانحنا ثم مال=وقمت اقطف من الجزلات بأفكـاري ونقيهـا
ارتبها على ميزان فكري ليـن فكـري نـال=ثمين القـول وهجوسـي بعيداتـن مراميهـا
وقبل ابدا بموضوعي ابذكـر ربـي المتعـال=على عرش العلا رب الملا عالـم خوافيهـا
ياربي عفوك ومدك ليا ضعفت بـي الاعمـال=نهار ٍ فيـه هالدنيـا تشيـب ابكـل مافيهـا
رجيتك ياعظيم ولايخيب ابك الرجاء لو طـال=تثبـت نفسـي لسنـة نبيـك ليـن اوفيهـا
ورجيتك ياكريم الطف بنا في ساعة الاهـوال=ليا جاء يوم فيه الخلق تحشر كـل ارضيهـا
وبعد ذكرك اعود الما بديته وابـدع الامثـال=اعود لزيـن قيفانـي واكمـل فـي معانيهـا
وابنصح من تكلم بالخطا من غير ذنب وقـال=بيوتـن ماتجمـل بالمعانـي وجـه راعيهـا
ترا ماتكتبه محفوض لو طال الزمـن مـازال=على وجهك يبيـن بيـوم نفسـك ماتبريهـا
وترا (الشاعر)لقب غالي ثمين ولايجي بالمال=يجي بأخـلاق وافكـار ٍ تناجيـك وتناجيهـا
وهزل الهرج ماله مع مراقيب العـلا منـزال=وفعول اهل الوفـاء ماكل ٍ بقافـه يزكيهـا
وترا ذم الرجال الي لهم وقت الشدايـد فـال=مصيبه والمصيبـه كايـده محـد ٍ يداويهـا
تذم عتيبه الهيـلا ولاتـدري عـن الافعـال=جهلت الوقت وأفعال ٍ شموع الوقـت تحييهـا
ويوم الناس فالماضي هذى راحـل وذا نـزال=ليا جو في ديـار القـوم تطردهـا وتحميهـا
لهم عادات وسلومن تقدي جيل بعـد اجيـال=هل النخوه توفي حق منهـو صـاح ناخيهـا
وهل بيوتن بنو سيسانهـا بالجـود للهشـال=وتفرج هم منهو سار مـن ماجـاه ناصيهـا
وانا ماقول في كل القبايـل قاصـر ٍ ينقـال=دروب المرجله تنشاف وصعبات ٍ مماشيهـا
حد ٍ يجري بها واحد ٍ على جسمه بها تفصال=وحد ٍ عنى حياته ماوصـل حتـى حراويهـا
هذا قول العتيبي صال في معنى القصيد وجال=ينادي كل جزلـه مـن هواجيسـه بساميهـا

المصدر: الملتقى الجماهيري للشاعر محمد بن فطيس المري