يالله

[الطير الرحال]

السلام عليكم مساء الخير بعد انقطاع سنوات أعود إليكم بهذه القصيده وأتمنى أن تنال إعجابكم


يالله ياخالق محيطات وجبال
رب الحجر رب الشجر والثقلين
يامنزل الكوثر وعم والأنفال
يامنزلن طه ويونس وياسين
يارب ترحمنا ليا جات الاهوال
في موقفن مافيه ربع وقريبين
يومن عبوس مشيبن روس الأطفال
يومن تشوف الناس مثل المجانين
ماينفعك وش كان عندك من أموال
لا صرت منتب من هل الحق والدين
الرابح اللي فاز في صالح أعمال
رجلن يحمد الله على الزين والشين
يالله يالمعبود يا عالم الحال
يالله ياخالق من الخلق زوجين
فيني عيوب وعندي ذنوب واهمال
عبدن ضعيف ورأس مالي من الطين
لا خير في شخصن على الناس يختال
مسكين ومثله خلق ربي مساكين
يارب ترحمنا ليا جات الآجال
في ساعة ماعاد فيها مجيبين
الموت حق ولا به شكوك وجدال
من لا يموت اليوم بيموت بعدين
عسى لنا في جنة الخلد منزال
مع النبي الهاشمي والنبيين
وصلاة ربي عد ما هل همال
على الذي مبعوث رحمه وتبيين

 

 

 

 

 

 

 

 

[رشيد]

صح لسانك اخوي
ماشاءالله - قصيده جزله