( ياشين بعض العرب لو غير سلوكه )

( ياشين بعض العرب لو غير سلوكه )

السلام عليكم ورحمة الله وبركاته

اتمنى ان تنال استحسانكم جميع واعذروني لان جميع قصايدي بدون تنسيق

تجدونها على هالحال ترا والله معرفتي محدوده جدا في الكمبيوتر فلا تملون من

طريقة النشر

اتمنا ان تكونو في تمام الصحه وقمة السعاده

اذا طرت لي علوم الزين وضحوكه
ـــــــــــــــــــ تبددت ضحكتي وانزاحت افرآحي

الليله الي مضت ماهي بمبروكه
ـــــــــــــــــــ أنطّرر جيب الظلام وعادني صآحي

كن فالصدر شوكه وفي ناظري شوكه
ــــــــــــــــــــ يذبحني القلب والاهداب سبّآحي

مدري عروقي من المعلوق محسوكه
ــــــــــــــــــــ والا من الضيق والا الشوق فضّآحي

والا جميع المسآئل جات مشروكه
ـــــــــــــــــــــ وما حل منها على الخفاق ما راحي

ذكرت لي حاجة بالفكر مشبوكه
ــــــــــــــــــــ ياكثر شي حصل من بعدها ماحي

محبة بالوفاء والصدق محبوكه
ـــــــــــــــــــــ اجيه وارجع وقلبي منه مرتآحي

الي بكفه ختوم الحب وصكوكه
ـــــــــــــــــــــ مرواح رجلي على شانه ومسرآحي

يا بو حمد بندق العدوآن مفلوكه
ــــــــــــــــــــ ومن يعتقه ضربها من صوتها طآحي

حدوه مني وكثرت حولي شكوكه
ــــــــــــــــــــ حتى غدا القرب والا البعد متوآحي

والا الصراحه ترا الاضلاع مدكوكه
ــــــــــــــــــــ سبة ونيني ونبض القلب وصيآحي

ياشين بعض العرب لو غيّر سلوكه
ـــــــــــــــــــ كبر الكسر ما يعدّل فيه الاصلآحي

كف الحقيقه بكف الصدق مملوكه
ــــــــــــــــــــ لو صار فيها سراب وغيم وريآحي

ولو جابو اهل الصلع للراس باروكه
ــــــــــــــــــــ ولو حطو اهل القنص للطير تلوآحي

ودمتم سالمين

المصدر: الملتقى الجماهيري للشاعر محمد بن فطيس المري