لاحت من المشرق

لاحت من المشرق

لولا الولا والروح لولا هواها=ما كنت انا شاعر على روس الاشهاد

والنجمه اللي شعشعت في سماها=داخل فوادي نورها عاش وقاد

احصد عذاب قلوب واجهل دواها=وازرع جمال احساسي بكل الابعاد

لو تشرق حروفي على اللي جفاها=تسمع لاحاسيسه دويٍ ورعاد

وش عاد من مرت عليه وقراها=تكفيه شرب الما وتصبح له الزاد

واللي من اوهام المشاعر جناها=يعلن لها بقلوب الاجواد ميلاد

هذي مشاعر شاعرٍ جف ماها=ترضي غرور الشعر في كل ميراد

وانا مطوقها بعزٍ وجاها=حتى وضعت لها تواقيع الامجاد

لاحت من المشرق شواضي سناها=حتى كست رمضى التفاكير سجاد

ما بين يوم ويوم يصدح نباها=لين الصدا سيطر على الصمت ثم ساد

ما دمت انا قصادها يا حلاها=انا اشهد اني خير شاعر وقصاد

والناس ماني مستخف بوفاها=من يصخر القيفان تبقى له ضماد

غيري من الشعار صيته تناها=شف ذكر ابو الطيب وعنترة شداد

لا زالت الابيات ترسم صداها=تبقى الجزاله ما بقى ذكر الاجداد

والهزله اللي ضاع من هو رواها=ما طيبت قلبي ولا تشفي اكباد

كم شاعر حروفه بقلبه رعاها=وكم شاعر لموج الطواريق ينقاد

هذاك كون فكرته واحتماها=وهذاك من خلف العرب يقدح زناد

وانا صعدت صروح ما احدٍ وطاها=ما غير ناصر له عليها ترداد

والفكره اللي كل من جا سقاها=خليتها لاهل العنا والتجهاد

يا نور عيني يا مرامي ضياها=ردي علي الشوف من صوب بغداد

بغداد راحت والوفى ما نعاها=يبكي علينا كل ما هبت انواد

رب القوافي قام يطوي رشاها=ما فاحت الدله ولا فاح براد

انا سمام قلوب زايد بلاها=وانا تريب المجد والعز والضاد

المصدر: الملتقى الجماهيري للشاعر محمد بن فطيس المري

ماشاء الله..
صح لسانك ناصر
وربي قمة بالجمال
ومو غريب عليك الله يحفظك يآرب

الله الله ياناصر اسرتني بهذاه ألقصيده بيض الله وجهك مدى الحياه
اعذرني ان خانني التعبير يبعد عيني إبداع شاعر ورسم أقلام فنان
تقبل تحيات وود اخوك سعيد القحطاني والاهنت

صح لساانك نااصر شااعر مميز ربي يعطييك العافيه ..لك ودي ..

اختي الماسه صح بدنش
وتسلمين على المرور والاطراء
تقبلي تحياتي وخالص تقديري

صح لسانك يالشريف

جزل كعادتك،،

سعيد محمد القحطاني

صح بدنك والله لا يهينك على المرور الجميل

ويكفيني منك بس كلمة صح لسانك تكفي وتزود يا ابو محمد

تقبل تحياتي وخالص تقديري

صح الله لسانك وبيض الله وجهك .. قصيده جزله الى مالا نهايه .. الله يزيدك ياناصر

الله الله يالابداع شاعر ونفس طويل ومتمكن تحتار هنا المقدمات والكلمات
وان نقول لشاعريتك الجزله روعة ماجادت به قريحتك هنا انت شاعرفذ
وشهادتي فيك مجروحه يابوحسين

غرام نجد صح بدنك

وتسلمين على المرور الرائع تقبلي تحياتي وخالص تقديري