إن كان خلك يعتذر عنك ويغيب ، موجهه للشاعر سعيد القحطاني ،

[فهد ثامر البقمي]

ابيات موجهه لإخي سعيد محمد القحطاني :


يالله يا عالم خفى السـر والغيب
................... يا جاعـــلٍ للعبد نهج العــــداله
تفرج لمن يونس بكبده لـواهيب
................... عسر المطالب والعنا قد ركـاله
يقنب قنيب الذيب فوق المـراقيب
................... يوم الدهـــر خَيم علينا خيـــاله
لا جيت أسلي خاطري زاد تعذيب
................... ذاق العنى من يوم محدٍ صفاله
دايم على هـــمه يجـــر الأساليب
................... ويبقى يدوم اللي تعــقد حبــاله
من واحدٍ صَوب على القلب تصويب
................... أعدم عروقٍ في محبة وصـاله
بين الرجاء والياس غربه وتغريب
...................عينٍ بكت والشوق ما طاب فاله
أنا أدري إن الحب درس وتجاريب
................... درب الهوى ما كل رجلٍ مشاله
يا سعيد مالك في هواهن مقاضيب
...................تلقا العوض من عند رب الجلاله
إن كــان خلك يعتذر عنــك ويغيب
................... دَور مع العــربان شخصٍ بداله
هذا كـــلام إمعذب الشعـــر تعذيب
................... قـــال القصيــده مبدعٍ في مقاله
فهد البقمي