اعاني وحدتي غربال

[الـقـيـصـر ابن فطيس]

السلام عليكم ورحمة الله وبركاته

اخواني اعضاء ورواد منتديات الشاعر محمد بن افطيس

احييكم

احب ان انسج لكم اول مشاركاتي الشعريه

في منتداكم الراقي والجميل

واتمنا ان تحوز على رضائكم ..



اعاني وحدتي غربال
ودمعي غرق اجفيني

ولاحدن عن حالي سال
كلن رفيقي بالليني

حتى شريكي بالبال
راح وغاب عن عيني

راح وغاب بعده طال
مدري انكان مايبيني

ويالله ياعلمن بالحال
شكيت بحر مافيني

اشفلي غليل الترحال
الا بجروحه كاويني


وسلامتكم

وبنقدكم نستفيد

اتمنا ان لا ارى الردود الباهته

 

 

 

 

 

 

 

 

[حمد السبيعي]

بدايه حلوه لك .. واحييك على انك طالب النقد البناء

اول بيت لك عجبني مع تصغير الجفن باخر كلمه بالشطر الاول .. لكن بعدين انت ضيعت الوزن بشكل كامل والوزن من اهم شروط الشعر واللي يفرقها عن النثر ..

انا اكتفي بهالكلام واخوانك الشعراء ان شاءالله يفيدونك اكثر مني

لكن انت موهوب وان شاءالله تتغلب على هالاشياء البسيطه وانشوف ابداعك وتميزك للاعلى

[شآسع المري]

كفا ووفاا السبيعي عناا < كان لي نيه اجامل

[حمد السبيعي]

لا هنت يا شاسع ^_^

[الـقـيـصـر ابن فطيس]

حمد السبيعي اند شاسع المري

يعطيك العافيه وانا بالبدايات وباذن الله مع النقد

سابلغ مرادي

[الـقـيـصـر ابن فطيس]

حمد كلامك عين العقل

انا ما اتيت لهذا المنتدى بالتحديد

الا على شان النقد

وللمعلوميه انا جايكم من منتدى انشر فيه قصايدي

ما استفدت منه غير التسليك

[حمد السبيعي]

اوكي ,,
انا ببدا معاك لانك شاعر زميل لي وتستاهل كل خير ..

موضوع الوزن ... ابسط شي انك تركب لحن ، اي لحن يخطر في بالك من اي اغنيه ويكون ثابت على اول بيت او البيت اللي بتبني عليه القصيده

واكتب واذا فيه بيت شذ عن اللحن معناه في كسر ،، ودامك في بداياتك حاول تكمل القصيده وانت تغنيها بلحنها ،

اتمنى ان الفكرة وصلت لك تراني ماش في الشرح خخخخ

[الـقـيـصـر ابن فطيس]

وصلت الفكره يالغلا

يعني اشيلها مثل الشيله تقريبا .. ؟

[حمد السبيعي]

عليك نووور ،، اسمع شلات وابن عليها قصيده

واذا تمكنت من الوزن يبقى عليها النقطة الثانيه اللي هي انك تقرا لشعراء كبار امثال بندر بن سرور وبدر عبد المحسن ومحمد بن فطيس واي شاعر انت تحبه .. وتكون عندك مخزون مفردات شعريه . ( نفس اللغه الانجليزيه تقريبا // تقدر تتكلم انجلش وانت ما عند مفردات او كلمات تكون فيها جمل ؟ )

والفكر الشعري والمضمون اوورريدي فيك وانا عن نفسي بتابع كل جديدك وبعطيك رايي بكل امانه واذا تشوف ان هالشي يحطمك انا بكتفي برد " صح لسانك "

اخوك

[الـقـيـصـر ابن فطيس]

يعطيك العافيه ياحمد

كفيت ووفيت ووصلت لي فكره كانت اتجاهلها

وباذن الله تكون قصائدي القادمه افضل حالا