يا يمه

[رشيد]

الشاعر خلف الكريع يقول في قصيدته:

..


هذا ماهو شيب لا تبكين ماهو شيب يمه
لا يهوْلك منظره في راسي وتبكين ، عادي
.
لا يغرّك لونه الأبيض ولا يفجعك كَمّه
صدقيني ما هو من الشيب ، هذا اللون بادي
.
تذكرين أصابعك لما تبعثره وتلمه.؟!
يوم كنت أوسده رجلك و أروّض لك عنادي
.
كل ما مشيتي أصبع بين شعراتي تشمه
لين صارن بيض من كبر الغلى وطهر الأيادي
.
شرّعي لي حضنك المعطور بالمسك أخمه
خمةٍ تبرى بها روحي من جروحي وَأنادي
.
ما أبي من الناس غير أذكارك وريحتك لمه
ولا أبي من النور غير سراجك ألن به حدادي
.
وما أبي من العز غير اللي تحت قدميك قمه
ولا أبي من الأرض غير جلالك أعلن به بلادي
.
ودي ارجع طفلك المغرور واللي كان همه
يصعد أطول نخله وَيشرب من حثال العوادي
.
يغسل نعاسه بأذان الفجر ، واصوات الأئمه
ويونّس الشيبان لا رتّل لهم : ( قُل يا عبادي )
.
وينهب أول خبزه لصاجك ويخفيها بفمه
قبل ما يصحى حدا اخوانه ويحتد التمادي
.
طفلك اللي ذنبه انه ما غسل بالدمع كمه
لين صار الكم الابيض من بطا دموعه رمادي
.
ما يخاف إلا: بكاك ، ودعوتك: ( حمىً تحمّه )
لا ركض جنب القليب وسمع نبضاتك تنادي
.
ولا كشخ بشماغ أبوه وشفتي الانظار يمه
تغصبينه , يشرب (القروه ) بخوف ٍ لا إرادي
.
ودي امسح دمعة ( استاذي الفلسطيني ) وأضمه
لا بكى في حصة التاريخ من ظلم الاعادي
.
واعتذر له عن سخافة جيلي وخذلان الامه
واتعلم منه كيف اروي يقيني باعتقادي
.
ودي ارجع طفل بعض عيوبه أجمل من شِيَمّه
يوم كان أصغر رفاقه عمر و اكبرهم مبادي
.
ودي افتش بتاريخي عن احلامي المهمه
قبل ما تهزم جيوش اليأس صبري واجتهادي
.
ودي أوشي بحزني الحاضر لماضيّي وانمّه
يمكن انقذ جمرة سنيني من الموت برمادي
.
بس وشلون اقدر ارجع ؟ ليه ماقلتي لي يمه ؟
ليه ماقلتي لي ان الشيب مشتاق لسوادي ؟
.
ليه فهمتيني ان الخوف من بكره مذمه ؟
ليه خليتيني اكبر واحمل ذنوب اعتدادي ؟
.
وين اعيّن خير يمه والأمل من غير يَمه ؟
الحطب يا يمه قليّل وبرد الليل سادي
.
كل ما غرست غصني سال في الحرمان دمه
واشعر اني وردةٍ مزروعة في بطن وادي
.
وانا والله ، ما رضيت بهالعنا من قلّ همه
ولا كبا غير الدروب أما انت وافي يا جوادي
.
احمد الله جاعوا عيالي وانا شبعان ذمه
ما زرعت الا الوفا والناس تاكل من حصادي
.
ما عرفت الا يا خال لخاله وعم ٍ لعمه
يوم ما ياسع هموم القوم غيرك يا شدادي
.
و انتِ يُمه لو بكيتي شيبي وهوّلك كمه
قلت يُمه : ماهو من الشيب هذا اللون بادي
.
تخبرين الثلج لا منه تكدّس فوق قمه ؟
هذا ثلج . وراسي القمه ولا تبكين عادي
.



.

 

 

 

 

 

 

 

 

توقيع : رشيد

. Rule NO. 1 : Rshed Is always right Rule NO. 2 : If Rshed Is wrong see Rule NO. 1 -