(( الببسي وحليب الخلفات ))

[الودعااني]

بسم الله الرحمن الرحيم

الأصاله لاتعني التخلف والتقهقر والرجوع الي الخلف ..
وأيضا الحداثه والتطور لاتشترط الإنسلاخ من الماضي
فبيرق الحاضر لايغني عن بصائر الماضي والماضي لم ولن يكون عدواً للحاضر

ولكم التحايا المبجله بالحب الأكيد

ملاحظه : لن = لأن أقصد ( لأن ) تنطق ( لن ) في بعض لهجات الباديه
وكذلك الحال في ( لجل ) و( لأجل ) .

(( الببسي وحليب الخلفات ))

ماني من اللي يطـردون القراطيـس
وهي عندهم كبـر الجبـال الرواسـي

ولا حب جلسات الرجـال المعابيـس
أهـل البشـوت معذبيـن الكراسـي

ومأهز راسـي حيـن دق المراويـس
وش هوله أدوخ بالخرابيـط رأسـي

أنـا هوايـه ريـح بـن المحاميـس
اللي يطيّـر مـن عيونـي عماسـي

فـي مجلـسٍ ماخربـوه الدنافـيـس
ولا دار فنجالـه بكـف الخسـاسـي

وإبكار جدي والغزايـز مـن العيـس
حليبـهـا مـأبـدلـه بالبـبـاسـي

وريحه رحولي كنها عطـر باريـس
يسوى ظهرهـا بالطعـوس التكاسـي

وطفطوف رجـمٍ برّدتـه النسانيـس
خلّى الثرا والفقـر عنـدي سواسـي

في راسه أسمـح للدمـوع المحابيـس
تقطر علـى أرضٍ رملهـا مايداسـي

متلطـمٍ وأرقـب بعيـد المرامـيـس
والحزن في وسط الحشـى مايقاسـي

عن خوة الأنـذال رمـت النواميـس
لن الوفاء في طبعهم شـيء اساسـي

غـز الظهـر بمّعكفـات الدبابـيـس
أشـد مـن دق النحـر بالمـراسـي

وإن دار عن ناسي براسي وساويس
أنسى خطـأ ناسـي ومانـي بناسـي

يامشبّهن شمس الضحـى بالفوانيـس
خطـاك بالضلعـان مالـه مقاسـي

وش جاب صوص الديك عند القرانيس
والا سراحيـن الـخـلا للبسـاسـي

وكريم في مالـي بخيـل الاحاسيـس
ومن يعطي الثنتيـن يلقـى المأسـي

أكتم شعوري داخلـي وألعـن أبليـس
وأطى على خـد الهـوى بالمداسـي

الروح ملّـت مـن منـام الكوابيـس
عيـا يـروح مـن عيونـي نعاسـي

حب النحايـف بـارزات الكراديـس
صايـب خلايـاء مخنـا بالتماسـي

جانا الهوى وحنـا طفـارا مفاليـس
وصرنا نطامر فـوق عقـمٍ سياسـي

لمّ الدراهـم مشكلـة فاضـي الكيـس
لجل العروب اللي تجيـب الطياسـي

يارب عفوك يـوم كانـوا ملاحيـس
أنتـه رحيـمٍ مـا خبرنـاك قاسـي

العيس : الإبل الغزايز من العيس : يعني خيار الإبل .
الطفطوف : هي الصخره الكيبره المائله والتي تكو ن في قمه الجبل .
رمت : من الفعل رام يعني أحب
المراسي : هوي مايثبت به حبال الخيمه او حبل الخيمه ويدق في الأرض ( يعني مسمار كبير )
لمّ : يعني جمع .

وسلامتكم طالة عماركم
الشاعر / عبدالرحمن بن عيد ( عذاب الغراميل )

 

 

 

 

 

 

 

 

توقيع : الودعااني

من صاحبـي زلتـه لاجـات امشيهـا امــا عـلى حشـمته والآ لشيبانه اطـا عليها ولا كنـي بـمـوحـيها واصد عنها وابرر غلـطـة لسـانه واحسب عواقيبها والله يـعـديـهــا من خوف لايدري الحاقد وشـيـطانه

---

التعديل الأخير تم بواسطة الودعااني ; 08-08-2012 الساعة 01:03 AM