عتقت من همي ونا كنت باموت

[هملان الغامدي]

عتقت من همي وانا كنـت بامـوت
واليوم ردتني علـى المـوت حنـا
جتني تمشاء وذبحتني بـلا صـوت
واقفت وانا اشـرب موتهـا واتثنـا
بالشارع اللـي كلـه اشجاروبيـوت
ومن يوم جتني طاير المـوت غنـا
غنا علي ورحت في بحـر بيـروت
اصـارع امـواج الشقـاء واتعنـا
اعوم بين الحزن والهـم والحـوت
المـوج منـا والغرابـيـل مـنـا
يشوتني موج الشقاء والعناء شـوت
واحـرم عيونـي نومهـا لاتهـنـا
في حجر عيني دماً احمر كما التوت
وذا بكـت منهـا كفوفـي تحـنـا
الحـب لاونـه قتـل روح بخـوت
امدا علـي حمـر النصايـب تبنـا
الحب ما لقيولـه النـاس ريمـوت
ولا لو انـه ينـوجـد وش عملـنـا
راع الهوا ما لقيلـه طـب وثبـوت
قدامنـا وشـلـون نلـقـاه حـنـا
الصبر مفتاح الفرج والصبر قـوت
وسود اليالي لـو نبـي مـا عطنـا
ما فرجت واعطت لمن فاته الفـوت
لافي وطـن ثانـي ولا فـي وطنـا
يلعب بنا وقت الشقـاء لعـب بيلـوت
غـاره ورا غـاره ولا قـد ومنـا
انشد مجرب ما يبي قـول وثبـوت
ما جتلي الدنيـا علـى مـا تمنـا
حبيتها واحبهـا لـو علـى المـوت
خلونـي اشـرب موتهـا واتهـنـا