محمد التويجري & عبدالله السناني

حبيت انا انسق المحاوره لكي لا تشوش ردود الصفوف هههه على المشاهد


محمد التويجري
سلام تسليم وافي للرجال الحشام _ تسليم للشاعر اللي يستحق الذهب
هذا السناني مسبب عايق(ن) للنظام _ويعاكس السير ماهمه كلام العرب
__________________________________
عبدالله السناني
يامرحبا يالمسلم واعليك الســـلام **واما الذهب قدمه للناس حسب الطلب
ترا السناني يجي للمحترم باحترام **واللحيه الغــانمه مقدارها بالــــشنب
__________________________________
محمد التويجري
دام البقاء يالسناني يارفيع المقام _ مير انت عرضت نفسك ياولد للعتب
افعالكم ياجهينه يوم ورد الحيام _ عدد لي افعالكم ياصاحبي بالرتب
___________________________________
عبدالله السناني
ان كانها من تجاهك قلت برد وسلام ** مير انت عرضت نفسك للعتب والتعب
افعالنا بالسيوف اللي تقص العظام ** ويسدنا بن غنيم اعتق رقاب الـعرب
___________________________________
محمد التويجري
حنا دروب الضحى وانتم دروب الظلام _افهم كلامي ودقق ياعريب النسب
حنا ترانا رجالن مانهاب الخصام _ احسب حسابك قبل نرميك وسط النشب
____________________________________
عبدالله السناني
مامن طمع بالردوف اكبر طمع بالسنام ** ياصحابنا اللي تـولع نــاركم بالخشب
والنعم فيكم لـكـن الـطـق فـك الــلــحـام ** والوقت ذل الــمراجل يوم عز الذنب
__________________________________
محمد التويجري
انا شبيه الصقر ولا انت مالك ملام _ طبع الحمام اللي ليامن بغيته هرب
حنا ذراكم ليا جاكم غبار وعسام _ ودلالنا للمراجل يوم غيرك رسب
____________________________________
عبدالله السناني
مايطرحن الصقور الا فروخ الحمام ** ان كان ماتدري انشد من يعرف السبب
اتـقـلـلون الفعول اتـكثـرون الــكلام ** وتـقـدمـون الدلال بـدون تـمـر ورطـــب
____________________________________
محمد التويجري
اهب يالشاعر اللي محسن الانتقام _ والمشكله ماظهرت بفرقة المنتخب
لاتزود الهقوه ومن ثم تصبح حطام _ من ثم يصبح مكانك مقترن بالركب
___________________________________
عبدالله السناني
انته رفعت العصا وانا رفعت الحسام ** نار الخشب ماتولع مثل نار الحطب
مادام ربعي جهينه والطلق فــالحزام ** ابــاترفع بــردي عــن قــليــل الادب
____________________________________
محمد التويجري
ابخيت ومحمد اعطوك الرخاء والتمام _يالسايق اللي مغامر بالطريق احتسب
البرق بالليل الاظلم فوق هام الغمام _وفيوز راسك من البارق تراه انظرب
___________________________________
عبدالله السناني
إلي الشرف بالثنين اللي تضد الزحــام **يالسايق اللي مع الـغفـله نقزت المطب
انته بوسط الرياض وبارق الغيث شام ** عسى يطيح المطر ويطيب منك الجرب