مـن روائـع الـشـعـــر

الصمت حكمه

قالوا علامك صامت وقلـت : يانـاس

كثـر الكـلام يـقـل لاجلـه مقامـي

الصمت حكمه , والحكي مصدر افلاس

ولقيت في صمتـي يزيـد احترامـي

الصمت له معنى وله ذوق واحساس

مركب نجاتك في بحـور الظلامـي

ترى الرجل صوره من الراس للساس

ثـم يـتـبـيـن مـعـدنـه بالكـلامـي

أما نطق فـي كلمـة ٍ ترفـع الـراس

تضفي على شكلـه جديـد الاسـامـي

ولا َّ يعـوّد معدنـه معـدن نحـاس

يرميه سهمـه عقب ماكـان رامـي

لا صار عندك من ثمينـات الالمـاس

خلـّه بصدرك ليـن وقـت التمامـي

أخاف يظهر لك مـن النـاس بـلاّس

ولا َ سفيـه ٍ مـا يــرد السـلامـي

الله خلق خلقه علـى عـدّة اجنـاس

وكل ٍ يسوقـه مذهبـه للأمـامـي

والله خلق بالطيـر قمـري وقرنـاس

ووقت الهدد مـا ينغـزي بالحمامـي

لا جال في صدرك من الهم هوجاس

وعينـك يحــاربهـا لذيـذ المنـامـي

ونفسك عليله والفكر صار محتـاس

إترك طمان القـاع وارق السنامـي

عليـك بالعالـي ليـا هـب نسنـاس

يبري الجروح الخافيـه والعظامـي

وخلك لربعك دايـم الـدوم نبـراس

وخص القريب وخص ٍ ابن العمامـي

خلك لهم في داجـي الليـل مقبـاس

وللصاحب اصدق من حقوق الغمامي

ربعك ذراك ليا لحق راسـك البـاس

قدّم لهم شربك ولـو كنـت ضامـي

وخلك لثوب الطيـب والعـزّه لبـاس

واتـرك دروبٍ تنتهـي بالحرامـي

وفعل الجميل وواجب الضيف نوماس

ومن لا نفع بالضيـق نفعـه عدامـي

بيت الكريم أبوابـه بـْـدون حـراس

وبيت البخيـل يعـد مثـل الهدامـي

وكل ٍ بهـالـدنـيـا نصيبـه بمقيـاس

يـاخـذ نصيـبـه لـو جفوه الانامي

وخلوني اسكت , هالحكي مصدر افلاس

لقيـت فـي صمتي يـزيـد احتـرامي

للعذب / ماجد العبدالله النماصي الشمري