ان كان تبغى تفل حجاجك المعقود .. ادخل مع الباب واقرا في مدونتي

[أمير الشريف]

(( قصه وابيات ))

سأكتب في كل اسبوع قصه ومعها ابيات من واقع لامسني .. وان شاء الله يكون هذا الطرح في محط الاهتمام لأن هذا الطرح سيكون في الاسبوع مره واحده فقط

قصة هذا الاسبوع مع الابيات

باعلمكم على سالفه صارت لي امس .. كنت على النت وجالس عاليوتيوب مقطع ورى مقطع .. المهم اتصل علي واحد من اخوياي وقال وينك فيه .. قلت في البيت .. قال تعال تعال بسرعه .. قلت وينك .. قال انا وفلان وفلان في الوادي منتظرينك.. قلت اوك جاي ..

شغلت الموتر واطير لهم .. سلام عليكم كيف الحال وش العلوم .. قالوا اجلس واسمع العلم .. قلت خير ان شاء الله وش اللي صاير .. قالوا فلان يحش فيك

<< طبعا كلمة يحش عندنا ياهل نجران بمعنى يتكلم في ظهرك

المهم قمت ابتسم وقلت وش فيها .. قالوا وربي مقطع ظهرك حش وانت تقول وش فيها .. نبى نروح نلعن والديه .. قلت هيه انت وياه ماذا حل ولا كان سمحت لكم تسوون شي ..

وارتجلت هذي الابيات .. قلت فيها

قالوا فلان يحش فيك وزاد من حمل العبي

وانه يناطح من وراك الشام في شاطي عدن

قمت ابتسم ثم قلت ياعربان صلوا عالنبي

عندي كلامن واسمعوه ولا تزيدون الفتن

خلوه يتكلم بظهري لين يسلخ منكبي

يكفيني اني لا حضرت بحضرتي ياكل تبن

الله يعزكم ويشرفكم

هذي قصة وابيات الاسبوع هذا .. ان شاء الله تشوفون قصه وابيات جديده في الاسبوع القادم

لكم مني كل التحايا