ღ .. تبغى تعرف اللي ذبح قلب ( سعودّ ) .. تعال واقرا ما يخطه عشانك .. ღ

يا مزين ابياتك ولـو فيهـا خلـل
بالوزن والمعنى وحـرف القافيـه


لانك عسل ولسانك ينقّـط عسـل
اقل كلمـه منـك عنـدي كافيـه


لبى بيوت الشعر وحروف الغـزل
ولبى الرموز الظاهـره والخافيـه


لبى البرائـه والنعومـه والخجـل
ولبى العيون الصاحيـات الغافيـه


لبيك كلك ,, من_الى وصل وزعل
وبكـل حالاتـك حروفـك شافيـه


اشفا بها واحيا بهـا ومـن الازل
وابـرد عباراتـك بقلبـي دافيـه


حتى البخل في قولتك (مالك امـل)
توفي معي حتى لـو انهـا جافيـه


وحتى الطلب لو رد ما احس بملل
واكـره نعـم واحـب لام النافيـه


وحنا سوى خلان وربـوع واهـل
وجذورنا قبـل الموالـف ضافيـه


خـل العـواذل لا تسمـع للعـذل
مـن العبـاد الوالعـه والطافيـه


وابسط مثل لا جيت بضرب لك مثل
ان المشاعر في غرامـك وافيـه


من سار في دربه على النيه وصل
وانا معك لو كـان رجلـي حافيـه


امشي معك كامل عقـل والا خبـل
بـس المهـم ان النوايـا صافيـه