لا جرة ولا شوفة #شعر

[سااهر]

.


هذي منازل هل المجمول دراسي

لا جرةٍ نستدلبها ولا شوفه

ووضع المحبين بين الناس حساسي

راعي الهوى خطوته بالخوف محفوفه

أخاف لا جيت بنشد ناسه وناسي

أدرى على السد من واشي وملقوفه

أخاف من واحدٍ حاقد وبلاسي

نفسه على الغدر والتفريق مشغوفه

ما له مع أهل الوفا صوتٍٍ ومجلاسي

دايم خلاف المقفي ينهش كتوفه

ولانيب عن حبها داله ولا ناسي

كبدي عليها بحد الشوق مشلوفه

أرجي مطيح الحيا وأزول عساسي

من شان ينقاد لي سلم ٍ على الحوفه

وأنشد عن النزل من ذا وذا ولا باسي

ما أحد ٍ من اللي بينشد مبديٍ خوفه

مافيه نكرة ولا في القلب وسواسي

وقت الحيا دوجة العربان مالوفه

وأقابل اللي جديلة سترها الكاسي

لاوقفت كنها بالبشت ملفوفه

أبو جبين ٍ بداجي الليل مقباسي

مقباس شهب ٍ على الشيطان محذوفه

معزل الوسط بالشبرين ينقاسي

من شافها قال م المثناة منصوفه

جمالها فطر من بالعرش متواسي

لاهوب روج ٍ ولا الحجان منتوفه

من بعدها الحال كنه فيه نساسي

ونفسي عن الزاد والمشروب مصروفه

-

#شعر / #شجاع_الأكلبي

.

 

 

 

 

 

 

 

 

توقيع : سااهر