كل العـذارى

[سااهر]

.

الا ياعيني اللي ما تلد بكل الازوالي

ولا تشبح وتفرح لين ترمق زول مظنونه

الا يا لوعتي يافجعتي يا كبر غربالي

على غروٍ الى سلهم ذحاح الموت بعيونه

ذبحني بالهوى حبه وسم الجسم من حالي

قضى لي لاجزاه الله وزاد الجاش بطعونه

اثر كل العذارى ما بهن من يرحم الحالي

لا شافن المولع بالهوى ماهمب ياوونه

الا يا عاذلي لو قلت لي خلن على فالي

انا والنفس عند مخضب الكفين مرهونة

على ما راد يلعب بي وتل القلب ما اوالي

كما تل الرشا طفقٍ على المسنا يحدونه

انا بالشمس وانته يا وليف الروح بظلالي

خطا ما خفت من سبح له الرعاد بمزونه

الا يا عين خرسا ما كره في نايف الجالي

انا وياك صرنا بالمثل ليلى ومجنونه

عليك العي كما تلعي طيور الليل عزالي

تفجّع بالبكا قلبي عليه وباح مكنونه

انا يا كيف ابصبر والغضي يطري على بالي

الا يا ويل من نفسه بعنق الريم مقرونة

انا عمّا مضى داله ولا ابكي فرقة الغالي

ولكن يا عذابي حالوا اهل الترف من دونه

عسى من سبب الفرقا وحاس بفقدي الغالي

عليلٍ كلما زاد المرض ردّوا يكوونه


-

حمد المغيولي


.

 

 

 

 

 

 

 

 

توقيع : سااهر