قصيدة موجهة للشاعر خالد العبيريد العتيبي

[عامر صالح ال شنيف]

السلام عليكم ورحمة الله وبركاته

قصيدة موجهة لأخي الغالي والعزيز الشاعر خالد بن سهيل العبيريد

إمتثل يا حرف وافهق صدر شاعرك المعرّب
قدلي كم ليلة وانـا اقضب شرهتي وادفع ثمنها

الشــوارد من هـواجيسي غــدت مثل المدرّب
له من البرقــع وحــال السبق والحيــلـة وهنها

مرهي ٍ بالصبر واثر الصبر والحــظ المكرّب
ســيرة إللي من عـــرف دنياه من فايت زمنها

جمّل الله من يــثــربـني وانا مـــانـي مثــــرّب
ولا رحـم حــي المعزز والمعــانـي مـن فطنها

يا خــوي المعرفة عطني من الــراي المجرّب
بفهق أضــلـوعــي وأقـدم علمهـا عمــا محنـها

ويش قـــولك في زمـان ٍ غرّب إللي مــا يغرّب
دولــة أيـــــامـــه شريعتهـــا تقــاذفهــا سننـها

شعّبت به فــي شعيب ٍ لـو مشــى فيها يعذرب
وان رقـــى يــم المسيلة شـــاف عبـــّادة وثنها

ومـا يعزر بالخــوي لا صار من شفي مقرّب
غــيـــر لا مسّـــح كفوفه من معــاميل ٍ دهنها

الغـبن والشـيـب والضيقة على حـالي تحرّب
والليــالــي حـيـلـهـا تفــرش على فـالي كفنها

وانت يـــا خـالد زبنك القــاف بالعلم المذرب
والنــوايــــــا سلمها سالــم ولي عندك لحنها

وسلامتكم وسلامة نواظركم

عامر صالح ال شنيف