ولا ضاقت الدنيا و على الكيف ما جات . . . اطلق حجاجك ثم توكل على الله

[ذكريات]

يغنيك عن كثر الحكي مجمل أبيات
ومن ياخذ المضمون يلقى الأدله

تدري وش اللي يقتل الحب بسكات
لا صرت في ( بوحك ) تحس بمذله

وتدري وش اللي يكسر الظهر حزات
لامن عطيت إحساس ( ماهو ) محله

وتدري متى تستاهل الطعن مرات
لامن خطيت الدرب و أنته تدله

لا تتبع المقفي على كل حالات
بعض الوجيه اللي تقابلك عله

ولا تسأل الغالي عن الجرح لا فات
نبش الحكي يزود الطين بله

طالع في من حولك وتاخذ شهادات
ما نلتها لو تدرس العمر كله

ناس تجر من أسود الضيق و نات
وناس تقضيها وناسه وفله

هذاك شال هموم غيره ولا بات
وهذاك ما يدري عن إحساس خله

أحدن يهين أصله على كل زلات
وأحدن ترومه شيمته ما تزله

لا تقول حظي من عنا الوقت قد مات
قل مات حظ اللي عناه استحله

ولا ضاقت الدنيا و على الكيف ما جات
اطلق حجاجك ثم توكل على الله