بعض المخاوى للرجاجيل تشريف #شعر

[سااهر]

.



الصدر ضايق و الخلايق ملاقيف

واليوم سلم اليوم مابه سلامه

اليوم ضاقت بي من السيف للسيف

دنيا دنيه ما عليها ملامه

ياصاحبي والحال ما عنه تصريف

ودي بخوة عاليين المقامه

شرواك يا نسل الصقور المشاريف

اللي على العليا و فوق الغمامه

احدن يدور سلوته بالغطاريف

واحدن يدور سلوته بالرخامه

والرجل ما يسلى وانا اخوك بالزيف

يسلى الرجل باللي يطير عسامه

خوة شباب(ن) ما عليها تحاسيف

بوجيههم للطيب وسم وعلامه

اللي تعز الجار و تكرم الضيف

وتموت ما تترك عليك المضامه

بعض المخاوى للرجاجيل تشريف

بعض المخاوى سود وجه و ندامه

قلته وانا من عام مالي مواليف

مليت من كبر الأمل وانصدامه

بيني و بين الليل قاف وسواليف

والليل يكشف بيض دمعي ظلامه

يا ليل عندي لازرق الدمع تعريف

ما ظنتي يا ليل تقوى فهامه

مل الدمع يا ليل مزن الصواديف

دمعن يبيح السد وقت انصرامه

يا ليل كم باقي على مزنة الصيف

يمتى يربع خافقي من عدامه

يا منزل الفرقان ما فيه تحريف

خفف عنا عبدن تولى زمامه

عبدن يعيش العمر فوق السفاسيف

كنزه قناعه راس ماله شهامه

يكفيه بالدنيا قليل المعاريف

اللي تحلي في حياته مقامه

اللي حداهم ما يعد المصاريف

وان عد عده في موازن كلامه

و الطيب في ساسه عديم التواصيف

مثل الفلاحي يوم غيره نعامه

ياللي تدل الطيب لا اتجاوز الريف

عند البدو واهل البساطه عظامه

قد قاله اللي مل هرج الملاقيف

والهم عنده مثل شرب المدامه

يا رب وان ضاقت من السيف للسيف

عوض علينا يوم قوم القيامه

-

#شعر
#حمزة_الهاشمي

.

 

 

 

 

 

 

 

 

توقيع : سااهر