الليل متعبني مثل ما انت شايف ..

[الودعااني]

الليل متعبني مثل ما انت شايف
الليل مرقاب الضلوع المهاديف

الليل نعمه واكثر الناس خايف
ان الليالي ما تجي له على الكيف

سواده ابيض من بياض الصحايف
وصباحه ادفا من حنين المواليف

لمعانقه يلتم شمل الولايف
ومفارقه يغتال ضحك السواليف

الله ما احلى فيه هاك النوايف
ليا اعتليت ابها نست المناكيف

لو كان حظّي منه حمل وكلايف
ابغاه بأرقى فيه روس المشاريف

اببتعد واسري خلا .. جيت عايف
مدري انتهي والاّ ابتدي بالصواديف

ما دام جرحي بين الاضلاع نايف
الليل ضيفني وانا صرت له ضيف

اثره حنون وما توقعت زايف
ضمّ الجروح اللي من الصيف للصيف



الشاعر : عبدالله بن غازي ,,

 

 

 

 

 

 

 

 

توقيع : الودعااني

من صاحبـي زلتـه لاجـات امشيهـا امــا عـلى حشـمته والآ لشيبانه اطـا عليها ولا كنـي بـمـوحـيها واصد عنها وابرر غلـطـة لسـانه واحسب عواقيبها والله يـعـديـهــا من خوف لايدري الحاقد وشـيـطانه