طبوع الطير {{الطيبه والذميمه}}

[محمد الوريكي]

اطبوع الطيور الطيبه واطبوعها الذميمة


نتكلم عن الطلع والطلع كما هو معروف ميزه طيبه في الطير .

وينقسم الطلع الى اربعة انواع (( حسب عرفي ))


النوع الاول:

وهو الطلع الراكد الي يركد على المرتبه ويطلع على اليد و يطلع الحبارى على مسافه بعيده ويركد من الصباح حتى المساء, ويكون حذر جدا ونبيه , ولا يكون طلعه كاذب , ويكون شديد الانتباه وتحصله مشغول في الالتفات يمنه ويسره خوفا لا تفوته حبارى عن غفله حتى انك تشفق عليه من حرصه الزائد, فهذا هو الغاية.

النوع الثاني:

وهو الطلاّع الذي يزهق من كثرة التطلاع على التكايه فتحصله يركد له 4 ساعات ومن ثم يزهق وتحصله اما ينقز (يطمر) على المرتبه الخلفيه ولا يكفخ يبي يطلع مع الدريشه ولا يبي ينط فوق راسك..


النوع الثالث:

وهو الطلاّع الذي اذا وجد الصقار جرة الحبارى اخذ منه برقعه وجعله يتطلع والسياره واقفه فتحصله يركد على المرتبه واذا مشت السياره كفخ او انه ينزل به خارج السيارة.


النوع الرابع:

وهو الطلاّع اللي على اليد فتحصله كأنه طابوقه على يد صقاره واذا نزلته على المرتبه كفخ يبي اليد , او انه ينزل به من السياره وهو على يده وتحصله لو يمشي مسافه طويله وهو على يده مايتحرك ولا يكفخ.

وطريقة تعليم الطير الطلع:

انك تجعل الطير اولا انه يوالفك وان يأنس اليك ومن ثم تربطه على التكيه وتجعله يعلف عليه وتخليه في اليوم

الاول ساعه ومن ثم تبرقعه وبكره تخليه على التكيه وتخليه يشوف فريسه مع النافذه وتعلمه كيف يخرج

منها بطريقه سليمه.


ومن اهميه الطير الطلع انه اذا كنت في مطر يعنى القاع راشها مطر فان الجرة ماعاد تبين بالمره فتلك اللحظه الطلع هو الحل.


ايضا اذا جيت قاع جبليه الجرة ماتبين الا مع الوديان او المساييل (( اثار السيل )) فتلك اللحظه الطلع هو الحل.


ايضا اذا كنت تقص ((تتبع) جرة حبارى وفجأة تجيك جرة غنم في حدود الالفين وتخرب الجرة بالمره ففي تلك

اللحظه الطلع هو الحل.


ملاحظة:
دائما تحصل الطيور اللي تطلع هي من فصيلة الحرار , والشاهين قليله جدا وذلك يرجع الى ان الشاهين
تحب الكفخ والطيران كل اشوي

ايضــا من الطبوع الطيبه والزينه في الطير هي :

عـــدم الحـــوم :

تـــجـــد بــعــض الــطيور انــه مـــايحوم لو يفل((يترك)) صيده بوقت الظهيره , لان بعض الطيور كما

هو معروفه اذا افلس من صيدته فأنه من الصعب انه يرجع لك فتجده يحوم ويتنكر على راعيه.


من الطبوع الذميمة في الطير هي :

الصــياح :

فتجد بعض الطيور التي تصيح تزعج الصقار في كل مكان ان كانت في السيارة فهي تزعجه وان

كان عند ربعه يبي ينقل الطير عندهم فتجده يصيح فيزعج اهل المجلس وان وديته للسوق وسمعو اصياحه

قالو: صيّاح مشكله.

من الطبوع الذميمة:

الهوش على العلف:

فأذا جاء وقت العلف وامسك بعلفته تشوف في حالة وحشيه وتعصب

ويحاول انه يضرب صقاره بمخالبه وذلك عداوة وذلك كله من اساس قل الصقاره يوم كان فرخ فقد كان

يوخذ منه العلف قبل ان يشبع .

التسرع بالكفخ اذا أخذ برقعه:

تجد بعض الطيور فيه طفوقيه اشوي , وهوانك اذا وجدت الحبارى واظهرته مع النافذه وخذيت برقعه يفوع

ويفر من يدك كأنه شافها وهو ماشافها فدائما يطير من يدك بدون ان يشوف الحبارى , فيطير في اتجاه

معاكس للحبارى فربما ان الحبارى هربت ومن ثم طارت وانت مطارد ورى الطير.

ايضا من الطبوع الذميمة :

الحوم:

كل ماهديته حام ولا ينزل الا على حمامة او ماينزل خير شر.


ايضا من الطبوع الذميمة:

كفخ الطير من الورعان ومن الحرمه:

فيه اطيور ترفع الضغط اذا شافت الورع الصغير او الحرمة تحصله تكفخ بشدة فلربما انكسر فيه ريش

او ان ريشه مازال يسوق فينفضخ الريش, ايضا اذا رحت والبيت مافيه الا اهلك وقلت عشو الطير

فأذا دخلو عليه وشاف زولهم قام يكفخ على زوره بشده , وهذا من شدة اختلاط الورعان والنساء مع الطيور

في الوقت الحالي عكس الزمن السابق فانك تجد الطير مع العائله في بيت الشعر ولا تحصله يكفخ من اي

واحد منهم,


ايضا من الطبوع الذميمه :

كفخ الطير في السيارة:

تجد بعض الطيور يكفخ في السيارة بشده وتحصله يضرب في التنده وهذه يضر بريشه وبصحته

فمثلا , وقد احصلت علي انا شخصيا اذا كنت تتبع جرة حبارى وهي قريب منك والوقت حار عليك اشوي

فتجده يكفخ حتى اذا لقيت الحبارى تجده وقد تعب جدا.


ايضا من الطبوع الذميمة:

صعوبة البرقاع:

بعض الطيور يغث كبدك بكثرة الكفخ اذا جيت تبرقعه , ومن يوم يشوف البرقع في يدك يصيح ويكفخ

هربا منه, فأذا جيت وانت عجل او وقت ظهيره يبقالك ساعة حتى تبرقعه وبعض المرات تبرقعه على الارض.

اشكركم اخوكم محمد الوريكي

 

 

 

 

 

 

 

 

توقيع : محمد الوريكي

[عبدالعزيز الشامان]

لا هنت يآ محمد

ألف شُكر لـ جهودك


تحياااااتي

[الفلوه]

لاهنت خيى وتسلم يمناك ع النقل الزين
تقديرى وشكرى الجزيل لهكذا معلومات
قيمه قد لايعرفها اغلب الناس
موضوع رائع ومميز يستحق التقييم

[رائد العصيمي]

لاهنت

معلومات مفيدة لي وللجميع

الله لايهينك

[محمد الوريكي]

تسلمو جميعكم
اسعدني تواجدكم

[waleed]

محمد
ابيض وجه يالذيب على الموضوع
شخصياً استفدت معلومات لـ أول مره اسمعهآ ،،
لاهنت
لاهنت

[قـاصد كـريم]

الله يعطيك العافية

استفدتا واستمتعنا ولك تقييمي

[مبارك الشمري]

اشكرك يا يا يا الوريكي

معلومات مستفاد منهاا تحياي لك وشكري

وننتظر المزيد

[غراااام نجد]

محمد ابدعت بطرحك المميز ماشاء الله عليك مجهود راائع

كروووعه حضورك ياالغالي ..

لك ودي + وتستاهل احلى تقيييم ..

[بن سيف]

صباح الخير يا محمد وكل عام وانت بخير يارب

داري مشاركتي متأخره لكن ما اجبرني على المشاركه

هو وجود اسمك و المعلومات القيمه التي ذكرتها بجد ما تقدمه مميز

ومفيد لي وللجميع دام عزك يامحمد ولا حرمنا الله من جديدك

حماك الله