ملف الذكرى لشاعر مشعل الشويش

[عبدالله السفياني]

عسـاك ي ليـل الشتـاء مقبل بخيــر
سويــت للذكـــرى بملفاك إعـــاده !

اسرجـت في داجيــك خيل التفاكيـر
والفكــر مضمــار الشــرف والإراده

الـذكريـات اللي طوتهــا المقاديــر :
تفلهـــا .. والهـــم يصهــل جــواده

اللي تهنـــا بالسهـــر والمساييــر
واللــي علـى ضــوه يسامر قنــاده

الشوق: نـــاره والمشاعر :مباهيــر
والصد: جوعـــه والمواصيـــل زاده

خفاقه المجروح يكفخ كمــا الطيـــر
والصبر في بعض المواقـف عبـــاده

وانا الغريب اللي رمى السر فـ البير
رمــاه .. مير محــدّر الدلـو صــاده !

ادفــع من الماضـي لعينــك فواتيــر
دين المشاعـــر فيــك يكثر ســـداده

اجني ضرايبهـــا مـن الغيــر للغيــر
والمستفيــد اللــي بليــا استفــاده !

ياليــل شرهاتـــك بعيني معاذيـــر
بـــارد .. وحلمي فيك ذعـذع بــراده !

عيس الهواجــس مقفيــات ومناحيــر
وحمولها مابين : (ضيــق .. وسعــاده)

مليت وآنا اقــرا وجيــه الشواعيـــر
وساحة قصيد اشبه (بحرب الإبـــاده)

كم شاعر" يشري كفوف الجماهيــر !
وكم شاعــر" ماهــوب يحتاج إشــاده

للطيــب: دار .. ولـ الشجاعه مناعيــر
وللمجــــد: رواد" وللحكــم: ســـاده

وللراي: حـزم .. وللمسافـه:مشاويــر
والسيــف مايجــرح وهو في غمــاده

حنــا نوردهــا .. وتقبــل مصاديـــر
على حياض المجـــد طنخــه وعـــاده

ميدانّـــا ماهوب ميــدان تحــريـــر!
ميدانّـــا .. ميـــدان نصر وشهـــاده


مشعــل الشويــش