الليل هوّد

[عبدالله السناني]

الليل هوّد والسماء مابه نجوم// ضاعت نجوم الليل من زين جوّه
بين السماء والارض مرتدمه غيوم// ضمّ السحاب قنوفه وهلّ نوّه
فزيت من نومي ولا طاب لي نوم// وسجيت مع بارق شعاني بضوّه
اخايل البارق وانا عنه مزهوم//واشدّ عيني بالسحاب وعلوّه
يالله عساه لديرة الزين معلوم//اللي عليها من البوارق تنوّه
يبلّغ اللي مانسيته الى اليوم//إنِّي لهذا اليوم راجي غُدوّه
اللي عليه القلب مولع ومغروم // خدّه كما البدر بسماه وزهوّه
وعيونه اللي كنّها عيون مظلوم// ذاق الظلايم من قساوة عدوّه
والمبسم بلون الشفق تقل مرسوم //والشعر له مع ظلمة الليل خوّه
الزين كوم وحكمة العقل في كوم// يمتاز في طبع الشرف والمروّه
يلهمني اليا صرت ضايق ومهموم// اكون في حضرت جنابه مفوّه
بيني وبينه حالت علوم وسلوم // تنتابني ذكرى الغرام لسموّه
ياعاذلي من بيننا حرب مبروم// ماتستطيع اشعب ركابك وسوّه
احارب العذال والقوه هجوم// والدرب من دون المحبه ايتوّه
اكفخ كما طيراً يبا يكسر الحوم// واخذ من الحر النداوي صُطوّه
أستنتج لنفسي دوافع من اللوم// واقول مسرى الليل والدرب توّه
اطرد سراب الوصل واطيح واقوم// وازبن على ضوحه زبون الجلوّه
أيقنت ان البعد لاشك محتوم// وازريت عن كثر الحديث اتفوّه
واصبحت مثل اللي من الحظ مهزوم// يساير القوّه على غير قوّه
غير اطلب الله والله اللي له الدوم// وارجي من الوضع المغاير هدوّه
حكم القدر يرضى به العبد ملزوم // لايعلم الإنسان خيره وسوّه
دام البشر قسمين معطى ومحروم// محداً على المكتوب يقدر يموّه
لو كلاً بكيفه تفرّد بمقسوم// مسيلمه مختار ختم النبوّه


عبدالله بخيت السناني

 

 

 

 

 

 

 

 

توقيع : عبدالله السناني

لاذكرتك جات بين العقل والخافق حرابه ** انت والخافق وعقلي كلكم ضد => السناني.؟ حسابي في تويتر ~> تُسعدني مُتابعتكم [فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]

[ثورة الزير]

أستنتج لنفسي دوافع من اللوم= واقول مسرى الليل والدرب توّه
اطرد سراب الوصل واطيح واقوم= وازبن على ضوحه زبون الجلوّه
أيقنت ان البعد لاشك محتوم= وازريت عن كثر الحديث اتفوّه
واصبحت مثل اللي من الحظ مهزوم= يساير القوّه على غير قوّه

صح السانك مبدع

[ماجد الشيباني]

الله الله
على هــــ الإبداع الجميل والتصوير العذب لخيال واسع
كلمات ممتعه ورسائل غرام مذهله
تسلم يمينك اخوي عبدالله
وصح السانك

[سااهر]

صح لسانك اخوي عبدالله
وتقييم عالي

[موسى ابومشهور]

ابيات راقت لي جدا
صح السانك يالسناني

[عبدالله السناني]

صحت ابدانكم واعذروني على التاخر في الرد لدخولي المتقطع