تعالي

[سااهر]

..
.
.
تعالي يابعد منهو قضى ثلثين من عمره
على رجوى اللقا واقف على درب المحبيني

دخيلك لا تذري الملح في جرحن نفد صبره
تعالي وارسمي البسمة بوجهي لا تعنيني

تعالي في حقول الياس نزرع للأمل بذره
عساها يوم تتحول من الفرحة بساتيني

تعالي نرجع أطفالن ونترك للعنا بكره
ونرسم في كراريس الهوا وردة وقلبيني

تعالي عن مشاعرنا نسولف والهوا جمره
وثلج البوح يطفيها ما دامت عينك بعيني

فديتك لا لبستي من الحيا ثوبن زهى الحمره
وقلتي الحب لو يطفي شموعك ما يطفيني

فديتك رعشة أيدينك تداعب للحيا وتره
قبل أقوم وأتجرا وأضم أيديك بيديني

وأقول الحب لو شفتي حدود العالم بكبره
كثير أصغر من ضلوعن تضمك يالغلا فيني

تعالي نحيي الماضي ونحيي للفرح ذكره
ونكسر ناينا اللي من حدود الدمع يدنيني

تعالي والعبي بشعرن يغار الورد من عطره
وحاكيني عن أحلامك وحاكيني وحاكيني

وحاكيني وأنا بسمع وأعيش الحلم من صغره
وأحلق في فضا حلمك وصوتك حيل يغريني

تعالي لا تخليني على باب الرجا مكره
أقز الجاي والرايح وأقول اليوم تاتيني

تعالي كان ماجيتي يقضي الباقي من عمره
جريحن راحت سنينه على درب المحبيني
.
.
#شعر// عبدالعزيز فرحان المخلفي
.
.

 

 

 

 

 

 

 

 

توقيع : سااهر