خصر وجدايل

[رشيد]

قصيده تعيش فيها حالة حب !
---
--
-


هذى اللى غلاها مايبي قول قايل

هذى أسباب غيضي والرضا والهيام

هذى رسومها بين الضلوع النحايل

هذى اللي على صدر القصيدة وسام

الأصايل يجنّك مثل أهلهن أصايل

والوكاد إنّها منهن بليّا كلام

يوم فلّت على الخصر النحيل الجدايل

واستدارت خجل مدري تصنّع غرام

عودها مال لو هي ماتبيه يتمايل

ماهو بكيفها من لين ذاك القوام

واقف وكن رجلي فوق جرف متهايل

للجمال بعيون العاشقين احترام

قلت فى خاطرى ماني عليها بعايل

لكن القلب سابقني برد السلام

ماني اللي حذف عند الزناد الفتايل

يومها ولّعت ناره تغطّى ونام

واجد الزين عند الحاضرة والقبايل

شفت واجد ومرّني مرور الكرام

بس هذي وصايفها علوم وهوايل

كنّها قطعةٍ من نور بدر التمام

يا كثر ملحها وإلا الحلا له دلايل

حورٍ عيونها والخشم سلّة حسام

كن ذيك الخدود.. بروق ماتنتخايل

لا كساهن شعرها شفت برق وظلام

تعسف الخيل ونفوس البشر تنتحايل

مير خيل القصايد ما يطيق اللجام

انتحيت ولقيت القلب ما من صمايل

كل ما ذعذع الغربي من الشوق هام

يا كثر ماني من الشوق والحب شايل

من عشق مثلها وشلون بالله يلام

...
..
.

ملك الحرف / متعب التركي

.

 

 

 

 

 

 

 

 

توقيع : رشيد

. Rule NO. 1 : Rshed Is always right Rule NO. 2 : If Rshed Is wrong see Rule NO. 1 -