إهداء إلى الشاعر الكبير محمد ابن فطيس ...

[بـدر]

هذي القصيده إهداء إلى الشاعر الكبير


محمد ابن فطيس وهي محاولة متواضعه لمجاراة قصيدته


التي قال في مطلعها


يالله وانا طالبك تغفـر لـي ذنوبـي يـا غفـور


ارجيك والجا لك وانـا سالـك واعيـد المسألـه


لو ماتطهرنـي بعفـوك مـا تطهرنـي البحـور


جيتـك وذنبـي قـد تعـلاّ غاربـي يـا مثقلـه


أنا من الطين انخلقت , أخطـي ولانيـب معـذور


قامت علي الحجّـه بدعـوة رسلـك المرسلـه

____________________________

أعجبتني أبياتك ياابن فطيس يانسل الصقور


جبت المثايل ياابن مره كامله ومكمله


سحابة هلت مطرها والفيافي في دهور


برق برق يم ابن ثاني والعيون تخايله


من أول نحسبك في غفله وأثر قلبك غيور


جتنا جمال عقيل منكم بالحمول محمله


هذا زمان يجعل العاقل يفكر في الأمور


أحد يحل المشكله وأحد يسبب مشكلة


حنا مع أهل العلم نصدر عن فتاويهم صدور


والكلمه اللي طيبه تبقى كما غرس نخله


على عقيدة السلف عقيدة حكمه ونور


نثبت صفات الله وأسمائه ماهي بمؤله


نوقر أصحاب النبي داعين لآصحاب القبور


والرافضي نبرا من جميع إعتقاده ودغله


تجارة الإيمان تجره يالنشامى ماتبور


اللي مايعمل أعماله لله أعماله باطله


والجاهل المغرور ماله في مجتمعه حضور


يشيل كبر في ضميره أكبر من ضلع جبله


ينقد رجال العلم وأهل الدين كنه بالثغور


ماشاف عيبه يمكن عيوبه من راسه لآسفله


بخيل بماله والمشاعر جامده مثل الصخور


والله مايعطيك من ماله ولو كان هلله


يصل الأباعد والأقارب منه في قطع ونفور


ملعون في الدنيا قطع رحمه ولا هو يآصله


أفكارهم متحجره والغل في وسط الصدور


ترى الفريضه تصليها الناس قبل النافله


فينا النفاق الإجتماعي صار يبني له قصور


محد يقول الحق راحت كلبوها مجامله


اللي في منصب وإلآ عنده مال طيب ومخبور


يكرم ويحشم مابقى إلا يحبون نعله


حتى لو إنه من زناة الليل وأصحاب الخمور


كلن يطبل له ويمدح مايناظر في عمله


أما الفقير بدارهم كسير خاطر ومحقور


حتى مايدعى في ولايمهم ولا له منزله


تبا لقوم ماتحن لضعافها هذا دبور


نبينا وصى عليهم في نصوص منزله


وشبابنا يمشي مع الموضه وقصات الشعور


يقول واحدهم انا جنتل واحب الجنتله


ترك تعاليم النبي ويقلد الغرب الكفور


قوم محلقة لحاها والملابس مسبله


واللحيه اللي عن مية ناقه عند الشيخ الوقور


ذاك الفقيه اللي يستنبط الحكم ويفصله


صارت تحلق بابخس الاثمان ويحط الفدور


يقول حالقها أنا طيب وراعي مرجله


كبير سنه ويتصابى كنه في عمر الزهور


تقول العرب سفاهة الشيخ أكبر معضله


أوضاعنا الاجتماعية سيئه وفيها قصور


ناسن تصرف مع نساها تصرفات مخجله


اللي يطلق زوجته وعنده منها عشرة بزور


هذا قليل الخاتمه يامخبله يامجهله


نقول للمظلومه أصبري والله يعين اللي صبور


يعوضك ربي خلي الشامي هو وايا محمله


من يعمل الجمايل في غير أهلها يلقى نكور


العرق ينزع لو من عصر الجدود الأوله


والشجره اللي طيبه تنتج من أطيب الزهور


واللي خبيثه طلعها خبيث مثل الحنضله


والراي من قبل الشجاعه في قديمات العصور


قالوا أصحاب المثل (( ديلوا قبل دوايله ))*


وصلاة ربي عد ماغنت على الغصن الطيور


على النبي الهاشمي اللي ربي أرسله

* صاحب المثل هو غالب الشريف وهو عجز من قصيدته اللي يقصد بها


منديل ابن غنيمان شيخ الملاعبه من مطير وهو رجل معروف بالحكمه وسداد الرأي..

أخوكم / بدر بن ماطر الحلفي المطيري ..

 

 

 

 

 

 

 

 

[عيوني حزينه]

ياهلابك اخوي بدر


وصح لسانك على مجاراتك


لاهنت والله يعطيك العافيه


تقبل مروري وترحييبي

لك تحيه

[فيصل بن عبدالعزيز]

صح لسانك اخي بدر .. ولك الفخر ان تجاري هامه بمثل هامه شاعرنا الغالي محمد بن فطيس لاحرمنا جديدك وطرحك الجميل .. تقبل مروري وشكر .. لك تحيه طاهره كطهرك

[نايف الشمري]

... بدر ...

صح الله لسانك يالقرم

نعمين بك وعشر بقبيلتك ولاقصور بالجميع

حضور مميز وبدايه مميزه

تقبل مروري يالغالي

[صاحبة سمو]

صح السانك والله

لاهنت يالذيب على الابيات الجميله

الف شكر لك جعلك ماتهون يارب

[عايش في الدنيا غريب]

صح لسانك يا اخوي بدر على هذي القصيدة الرائعة

واتمنى ان لا تحرمنا من جديدك الجميل


وتقبل تحياتي ومروري

[FAHAD]

صــ لسانك ـــح

[العقاب]

صح لسانك يابدر


والله يعطيك العافييه

[ألاداره]

مجاراه مُشَّرفه وأبيات مؤثره..


تملك شاعريه جميله..أبدعت يالغالي

صح لساانك.

[بـدر]

عيونك حزينة

فيصل بن عبدالعزيز

نايف الشمري

صاحبة سمو

عايش في الدنيا غريب

فهد

العقاب

ليل العاشقين


صحت أبدانكم جميييعآآآ .. و لآهنتوا

تشرفت بمروركم ..