بنت برقا

[شنق ونق]

بنت برقا يا جماعه تطلب البيت المثالي
صوب حرٍ ما لقينا له شبيه ولا تشابه

قلت جاك الوصف غالي لو طلب نعطيه غالي
حي مرسالٍ وصلنا حي تعبيرٍ لفا به

الله اكبر يوم هديت الفكر ثم طار عالي
يشبه الحر القطام اليا هوا يدمي صوابه

المناكب واسعه والنايفات لها تلالي
والمواسي حدها يقطع وصدره به رحابه

حي بوز يوم ينهش فاللحم مثل السلالي
والمناخر واسعه مثل الكباري جوف غابه

افجحٍ كن دق صدره نقشة امات الدلالي
جل سبحان الذي صور وبخت اللي مشابه

حرٍ متمم عليه من المزايا كل حالي
احرش وصياده يفج النحور بلا غرابه

جيت لك بالوصف ياللي جيت تطلبني مقالي
بس فالتصميم لا تدخل مسيقاكم لبابه

لكن اللي باقي عيون الوحش تسلب خيالي
لا تلوموني لو انه ضاع من راسي صوابه

ابحر بموجٍ قتامه في ظلام الليل سالي
يا عذاب القلب يوم اشوف عينه يا عذابه

بنت برقا جاش مكتوبي عن الحر المثالي
كم تمنيت اني اتقناه واقصد في جنابه