السلام عليكم هذي قصيدة من كلماتي واتمنى ان تنال اعجابكم :-
هاض الخفوق واتعب الفكر هوجاس
وأخذت افكر بالسنين وعبرها
قعدت أحسب واضرب اخما باسداس
وطلع لي الناتج وقلت اختصرها
مادمت شاعر واكتب والشعر باحساس
ودي انقي من المعاني دررها
وان زاد همي واشغل الصدر وسواس
اعوذ بالله من الجنون وزمرها
بعض البشر في صحبته ترفع الراس
لاجيت يمه جيتك ماحقرها
وبعض البشر ليته بالاقدام ينداس
لين الحياة تذوقه من كدرها
بعض الرجال افعالهم دوم نوماس
يفخر بها الرجال لامن ذكرها
من يفعل المعروف يلقاه ياناس
ومن يغرس النخله بيجني ثمرها
الطيب يبقى للرجاجيل نبراس
والمرجله تبقى ويبقى اثرها
للعز قيمه ماتقدر بالالماس
وللمجد قصه مااحد قد نكرها
الوقت قاسي والبشر عدة اجناس
ومن لارقى العليا حياته خسرها
مرت علي سنين واليال منحاس
والقلب يشكي والسعاده هجرها
