فاتح(ن)عوج المحاديب المحاني
اقلطي فالك قدوع وشــــــاذليّه
.....
كيفها من صافي البن اليمـــــاني
اشربي! فنجــــالها راحــــة يديّـه
.....
مرحبابك يـــوم شرفتي مكــــــاني
لك محـــل ولك مقام ومقدريـــّه
.....
كامل(ن) بالزين ياسهيل اليماني
ليه تجفـــاني ونـــا نفسي طريـــــّه
.....
جل من سواك يـــازين الثمــــاني
ماش مثلك يالهنوف العــســـوجيّه
.....
جيت لك مكسور خاطر في ثواني
واعتبرتيها علــــي اكبر خطيـــــّه
.....
غلطة الشاطر عشر ماهي ثماني
ولا حسبنــــاها عليــــكم يابنيـّه
.....
الله اللي من محبتكم عطـــــاني
ليـــــه ماترضين في يالادميــــّه
.....
لعنبو حض(ن)عرفته بك رماني
فارقي مامن وراك الا الاذيــــّه
.....
كيف ابذكر واحد(ن)مثلك نساني
من نساني؟عاد ليـلــى العامــــريّه
.....
لاجمال ولا دلال ولاحنــــــاني
(تو)مابانت علومك يالرديـــــّه
.....
الرجاجيل الشريفه ماتهــــــاني
لو تقص ارقــــابها يالمودميّه
.....
والله انه حان وقت السب حاني
وساعة الصفر ابتدت يالعاذريّه
.....
خاينه ومنافقه مالك امـــــاني
في دروب البزوطه منتي صريّه
.....
مافلحتــي فالنـــهايه بامتحـــاني
ولافلــــحتي بالدروس الاوليّـــه
.....
والنتيـــجه بس كلّمه من لســــاني
مقتبسها من حروف الابجديـــّه
.....
لو ابذكرها ترى ماهوب شـــاني
تصبح الدعوى على راسك قضيّه
.....
البري دايم بري ماهوب جــــاني
وانت جاني في ضحى عيد الضحيّه
.....
صاحب الدعوى لزوم انه يعاني
لو تناســـاها تذكرها عشــــــيّه
.....
تكشف الاسرار دورات الزماني
والحقيقه واضحه ماهي خفـيـــّه
.....
مانجازي من هجرنا بالحساني
ولانجازي صاحب السيّه بسيّه
.....
اطمأني دام لك عندي ضماني
اتركي موضوع دعـــوانا عليّــــه
...............
