الملتقى الجماهيري للشاعر محمد بن فطيس المري - عرض مشاركة واحدة

الاوسمة · #1 03-20-2011, 07:36 PM

غـرنـوقـة طـرقـى وزينـش عثـابـش

جيتي من الله حظ والحظ جابش
وحطيت لش في خافقي قصر وفراش

قصر الا جيتي زهى في جنابش
وضلع الا نمتي على القلب غطاش

شوفي جروحي بين سارح وغابش
جرح يعيش وجرح بالجرح يعتاش

غرش حلاش وخربش وابتلا بش
وأنا بلاني الهم جعله مايبلاش

غرنوقة طرقى وزينش عثابش
يازبدة يجرح طلارف خدها الشاش

حناش ماهو اللي يزيد الحلا بش
كفش من يزيدن مناقيش حناش

عيبش دلع خلقه لو إنه ماعابش
وعيبي الا اقفيتي ماعرف اترجاش

حتى لو إني شاقي من عذابش
متبسم وكبدي تضايق من الجاش

عديتش انش ماي عيني وارى بش
تخيرين الزين واشوف لرضاش

اكف سمعي من عذول وشابش
واغض طرفي من عيون تحلاش

اخاف لا اوقف على طور بابش
ثم احرجش من بعد ما انا اتحاشاش

مانتي بخطيم كل من جاء غدابش
ياحرة عودش على العز رباش

مالش لوى حتى لو القلب شابش
شاللي مشيبني سو بحة حكاش

اخطي على وارهي بقلبي صوابش
وحقش علي من العتب يوم ينصاش

قلبي ماهوب اياه سبة غيابش
والحين بصرش فيه لو مات يفداش

ذقت الجروح وخافقي ماهنابش
لكن كلام ياصلش ويتعداش

كانش حسبتي للمفارق حسابش
روحي وتكفين استري كل ماجاش

اكبر قهر لا مات قلبن حيابش
وراحت مشاويره وحبه على ماش

غير الله الله دامني عند بابش
والرأي رايش بين وصلش وفرقاش

اما بعذر صدق يعفي غيابش
والا تناسيني ولش مني انساش

المصدر: الملتقى الجماهيري للشاعر محمد بن فطيس المري