الا ياشيب راسي نغرس الغرسه ولاتنتج
تصورت الخطاء من غارس الغرسه ومن وقته
سقيناها زلال العد جمه صافي المنهج
على طول الزمن صافي ولا الاكدار غثبرته
وواصلنا الجهد لعلنا نلقى لنا مخرج
وزاد البل طينه بعد حان الجني لثمرته
افرك في اليدين وحلم خيل الفكر صاير عج
تذريها الرياح وباب امانينا مسكرته
املنا في الكريم يغير الاحوال والمدرج
يطير الحر الاشقر في السماء من بعد مشكلته
مطوح نظرته من فوق لايمشي ولا يعرج
طريقه راسمه ومنور الظلما بمعرفته
عسف كل المشاكل واصبحت تركب ولاتسرج
يقدم للحياه دروس من فكره وتجربته
تدارك مامضى نحر الشوارد قبل ماتحرج
ويطبخها وفار القدر من ناره وتبصرته
ولا همه سواليف الحسود اللي مجرد هرج
نجح واثبت نجاحه في حياته من معاصرته
عبدالله السفياني
