الملتقى الجماهيري للشاعر محمد بن فطيس المري - عرض مشاركة واحدة

#1 07-03-2017, 09:27 PM

الآداب والحُسن

.
.
.

والله إنه غاليٍ لو حصل مهما حصل
يكفي إنه داخل القلب حبّه غامره

ما يهمّه هرجةٍ مالها ذوق وقبل
يعتبرها مزحةٍ من حبيبٍ عاذره

وادري إنه ما يقابل جهاله في جهل
ايتغاضى فيه روحٍ جميله طاهره

له صفاتٍ كنّها الدر في عقده كمل
بعض منها يذكر وبعض منها ساتره

جمّله ربي برقَّه ورجحان العقل
يملك الآداب والحسن كلّه ساطره

ان تكلّم في فصاحه حلاوه من عسل
يجذب الاسماع وقلوب معها حاضره

وان سكت له هيبةٍ في العذارى مكتمل
بدر كامل في تمامه في ليله عاطره

ان ضحك والاّ تبسّم علا وجهه خجل
ضحكته فيها دلع باحتشامٍ ظاهره

وان جلس له جلسةٍ ما تحس بها ملل
كوكبٍ دري حوله نجومٍ ضامره

وان مشى في مشيته لا ثقيل ولا عجل
معتدل في خطوته كل خطوه حاذره

وان نظر نظره بعينه وجفنه به كسل
تلوي اعناق البشر غصب فيها ناظره

ما توفِّيه القصايد ولا كل الجُمَل
لا حداثه لا نبط لا فصيح وخاطره

تعجز حروف اللغه من نقط والا همل
ما توفيه الوصايف في وصفه حايره

هي مناتي هي حياتي عشانه محتمل
محتمل جور العواذل وناس غايره

-
#شعر
مقرن بن متعب الهرف

.
المصدر: الملتقى الجماهيري للشاعر محمد بن فطيس المري