[روابي]

من زمـرة الطـاغوت حذراك حذراك ** لا تبـتلي بـ جـروح يصـعب دواها
وإلى مشـيت أعرف دروبـك وممشاك ** أحـرص على نفـسك وخـالف هواها


أمّـارةٍ بـ السـوء مـا هـي بتـنهاك ** أقـبض علـيها ليـن يجـلى صداها
أقـطع نـوايـاها بـ ديـنك وتقـواك ** هلّـل وعـند اللـه سـريـعٍ شـفاها


والعيـن لا تـنـظر بهـا مـن تعـدّاك ** المحصـنه لـو تلـتفت لـك وراها
أصـبر عـلى هـمّك وغـمّك وبلـواك ** عـفّ وتعفـف لا يغـرّك حـلاها


وأترك حـرام القـوت مـاهو بيملاك ** كـل البـطون الجـايعه مـامـلاها
رشـفة حـلال أتسد جوعـك ومضماك ** تسـوى مشـاريب الحـرام وغـثاها


النـار في جوفـك وتصـلى حنـاياك ** نـار الجـحـيم تـزيد لـلي وطـاها
وأحفـظ لسـانـك لا يجـرك ويبلاك ** أخـذ الثمـينه لـو غـلى مشـتراها


الهـرج ميـزانـك ويكـشف خفاياك ** كـلمـة تعـيـبك لا تبـيّـن نبـاها
صون الكـلام وصون نفـسك ومبداك ** لـ النفس حشـمة لا تفـصّم عـراها


أصمت مدامـك عـارفٍ سير مجراك ** لا تنـقـل النّـمة وتبـحـث خـفاها
يـزول قـدرك عـند أقـرب دنـاياك ** لو هـو ولـد عمّـك حيـاتك جـفاها


وأحـلم تـراه الحـلم يرفـع مزايـاك ** هـو سيّـد الأخـلاق هـو مبـتداها
وصّى بـه المبعوث مـا هو بـ يخفاك ** شـفـيعـنا يـوم المـلاقاة طـهَا



خلّ الجهـل لا تجـعل الغيـظ ياطاك ** ترى الجـهل سـمّ القلـوب وعـماها
وإلى ابتلـيت أرفـع إلى اللـه شكواك ** لابـدّهـا الأيـام تكـشـف غطـاها


أصبر يزيـن الحـظ ويزيـن مرماك ** والـلّـه يفرجـهـا ويـدفـع بـلاها
لا تمـنع المحـروم لامـن تنـصّاك ** الناس لـ أجل النـاس وأحسن عطاها


أبـذل لـ وجـه اللـّه واللـّه يجزاك ** مثـل الغـروس أتطـيب لـلي سقاها
لا ضاع معـروفك ولا ضـاع حسناك ** إن كـانها لـلـّه، تـلـقـى جـزاها


جارك ولـو هو جار تسقـيه من ماك ** علـيـه لا تـرفـع يديـنك عـصاها
أحسن جـوار الجـار لو كـان يشناك ** ترى العرب تحـشم كـلاب أقصراها


بكـره يشـدّ ويكـتب اللـّه فرقـاك ** عسـاه يـذكـر جـيرتك ما نسـاها
الظـلم شـين ويجعل النـار مثواك ** راع الظـليـمه عيـشـته ما هـناها


فـوقك إلـه العـرش عـالم نوايـاك ** ينـظر قلوب النـاس وش محـتواها
يسمع بما تجـهر وعـارف خـفاياك ** بـ أمره شروق الشمس ترسل ضياها


هو عـالمٍ غيـبك وركّـب خـلاياك ** هو خـالـقٍ فـيك العـروق ورواها
والضيف لـه حـقٍ إلى حـلّ بحماك ** قـلّط ضيـوف الـلّه وأكـرم لحاها


لا تحقر الضيـفان وأتـشح بـ غذاك ** من مـا عـطاك الـلّه قـلّط عشاها
وعلـيك بـ اللي حـزة الضيق يفداك ** لا شـانـت الدنـيا ودارت رحـاها


لامن زهمـته لـو على الموت لبـّاك ** عيني لـ أجل عيـنك وروحي فداها
ترى الخوي نبـراس روحـك وملّجاك ** لا كـلّحـت بقـعا وزادت غـثاها


حـذراك من بعض المخـاليق حذراك ** بعض العـرب ما تفرقـه من نساها
تايـه وضـايع بـين ذولا .. وذولاك ** فـيـه الجهـالـة واصـلٍ منـتهاها
الشاعر / راشد القحطاني

 

 

 

 

 

 

 

 

توقيع : روابي