الملتقى الجماهيري للشاعر محمد بن فطيس المري - عرض مشاركة واحدة - على الله يا زمن بشكي جروحي والليالي طـوال

#1 09-04-2012, 02:47 AM

على الله يا زمن بشكي جروحي والليالي طـوال

على الله يا زمن بشكي جروحي والليالي طـوال
عسى راعي العنا ينسى عناه وينشرح صـدره

على الله يا زمن بشكي همومي والهموم جبال
تعـدّت عاصمة حـزنـي حـدود العالـم بأســره

خســاره يالسنين اللـي كتبتـي ســيـرة الرحال
فرحت أمس وحزنت اليوم بس اخاف من بكره

لساني كم (شكى صمته) والى منّه حكى ما قـال
طغى (طبع السكوت) بسيرة المحروم من صغره

سقى الله يوم كنت اضحك وبالي مستريح البـال
ضحوكٍ ماعرفت الحزن وش معناه وش قـدره

وكبرت وكبرت أحلامي وصارت قصة الترحـال
أماني في مهـب الريح وحلـمٍ (ماكتمـل) بـدره

بعذر اللي مع أيامه جلس (يبكي) على الاطـلال
تـذكر ماضـي أفـراحـه اليــن (خنقتـه العبــره)

عزيزه يالعيون اللي حضنتي (دمعـة) الرجّـال
حبستي دمعته بين المحاجر يوم (ضاع) امـره

عزيزه يالحروف اللي (سكتي) والكـلام يقـال
حكيتي.. (ماشكيتي) الهمّ وهمّ القلب (ياكبره)

عزيزه ياليدين اللي ثنيتك (باصعـب) الاحـوال
اكفّك ســـاعة الحاجـه وامـدّك ســاعـة القـدره

عزيز النفس لوتصبر على (صبر) الليالي نال
ابصبر والرجل يصبر ومقياس الرجـل صبـره

انا منهو (حمل همّه على راسه) تقـول عقـال
مجاديف الزمن (دارت عليه) ونَسّـف الغتـره

انا منهو فقد صوته وبعض الصوت به مازال
دعيــت الله يفـرّجهــا علـيّ (وبحَّـت النبــره)

أشيل الحمل عن غيري وحملي صار ماينشال
كما الشيخ الهزيل اللي مشيبه (منقضٍ ظهـره)

(جروحي مزنةٍ) منها هطل فيض الشعر همّال
سـقت جـدب العروق اللي تبلـل ريقهـا قطــره

وعن (حر الزمن) صارت حروفي للجروح ظلال
تذرّت عن (هبوب الياس) حلمٍ قـد بنـى قصـره

عساها للمطر روحٍ بها وادي (الظما) ما سـال
عروق سـنينها جـفّت وورّاها (الزمـن غـدره)

عسـاها للمطـر روحٍ قضـى مرباعهـا مـاطــال
كساها (ثوبها الاصفر) وكانت تلبس الخضره

على الله ينجلي وقتٍ قضيته (همٍ) و (غربـال)
ويشعّ النور في قلبٍ غشى (ليل الظَلَم) فجـره

(على الله) والـولي الله وبامر الله يزيـن الحـال
ويضحك للزمن قلبٍ مع (همومه) قضى عمره

مما راق لي
المصدر: الملتقى الجماهيري للشاعر محمد بن فطيس المري