من بعد فرقى الوليف اجر موالي=مثل الحمام الذي تتساجع لحونه

لا من ذكرته يكدرني وانا سالي=وان جيت ابا انساه قلبي ضاع بعيونه

غالي علي والهوى اللي مر به غالي=اغليه والروح في ذكراه مسجونه

عليت له في فوادي منزل عالي=ما غير حبي وتقديري يمرونه

اسقيه من كاس ودي سكرٍ حالي=واتجرع المر يوم اغني بدونه

فكري وقلبي وهاجوسي معى حالي=تمشي معه والهوى له ترخي متونه

يا حيف يا حيف كيف يطيع عذالي=والروح بامره وتحت ايديه مرهونه

في كل شارع سنا خده يورا لي=واشوف برق المخيل ان بانت سنونه

واليوم ما عاد غير اقاف بالاطلالي=وامر درب الوصال بروح مطعونه

المصدر: الملتقى الجماهيري للشاعر محمد بن فطيس المري