القصايد بعثرت فيني (حنان الموضه)=لين قمت ابعثر حروف الجمل تلقائي
ما دريت اني مسوي يا قصيدي فوضه=غير يوم الناس لامتني على ايحائي
والرجال اللي غدت بين العرب محظوظه=الله يبارك علي في حظي العشوائي
دام ناموس الكرامه داخلي محفوظه=مستحيل انثر على العالم جميع اعبائي
ايه يابرقٍ من القبله تبادا نوضه=بارقه يرسل شعاعه في جميع اجوائي
الجسد والروح مما شافته مرضوضه=والعنا والياس ترجمني على ضوضائي
كل بحر وكل طرق وكل مجد اخوضه=بس نور البرق يسعى دايما لاغوائي
السيول اليا زمت كلا يعبي حوضه=والنوايا لا تردت تشحن البلوائي
لا ارتفع سهم المشاعر او بقت مخفوظه=والله ان ابقى على راس السنام النائي
كل حاجه في زمنا يا بشر مرفوضه=تستجر النفس مثل الدانه الحسنائي
والحجج مهما تعسر دايما منقوضه=بالرضى بالطيب لازم تستمد ارائي
ناصر اقبل بالجمل واغراضها معروضه=كل واحد ينتقي منها بلا استثنائي
والعقول اللي معى هلها غدت مخضوضه=الله ينجي هل العليا من الاغمائي
