الملتقى الجماهيري للشاعر محمد بن فطيس المري - عرض مشاركة واحدة

الاوسمة · #1 07-07-2012, 10:24 PM

درب الشرف يحكم السير

.

الف اولف من جزيل المعاني
ابدا بذكر اللي لدينه هداني
.
اللي خلقني فرد وانطق لساني
الواحد القهار علام الاسرار
.
والبا بعد ذكر الولي نبدع القيل
مما طرى بالبال زين التماثيل
.
مثايل معها تزين التعاليل
من واقع التجريب لصغار وكبار
.
والتا ترى الدنيا قصير مداها
لذاتها تفني ويبقى عناها
.
الرابح اللي باعها ماشراها
والخاسر اللي ظنها تالي الدار
.
والثا ثبت بالعرف والعقل والدين
من عصر ابونا ادم ليا وقتنا الحين
.
ان الخلايق كلبوهم مقفين
كل يجيه الموت قصاف الاعمار
.
والجيم جنة عدن للي يبيها
يعمل لها وان راد ربي يجيها
.
واللي تجيه الموعظه ما يعيها
خطر عليه ان مات يروح للنار
.
والحا حبيب الروح سيدي محمد
الصادق اللي بالرساله معمد
.
من عند ربي للخاليق تعمد
عليه صلو عد ما طاير طار
.
والخا خسر من ضيع زمام دينه
تلقى حياته كلبوها غبينه
.
يطرد ورى الهزله وينسى السمينه
يمشي على عمياه في وسط الاخطار
.
والدال دل القلب في مسلك الخير
خله على درب الشرف يحكم السير
.
لا تلتفت للي بدالك من الغير
خلك على منهج طويلين الاشبار
.
والذال ذل النفس طاعة هواها
وحرمانها من غيها هو دواها
.
والرجل لا فكر بعقله قواها
وان قادها تنقاد ما هو بمحتار
.
والرا ربيع العمر لا لا يفوتك
اغنم شبابك قبل ميعاد موتك
.
اعمل على دينك واقتات قوتك
اغنم شبابك قبل تهرم وتنهار
.
والزا زهابك في مسيرة حياتك
حافظ على دينك واتقن صلاتك
.
صم واذكر الرحمن وادفع زكاتك
اقض الثواني بين تمجيد واذكار
.
والسين سرك لا تذيعه وتنحاس
ان كان ودك دايما ترفع الراس
.
لا تشتكي همك على اقرب الناس
اشتك لمن هو يعلم السر وجهار
.
والشين شب النار واكرم ضيوفك
حتى ولو ما فيه حي يشوفك
.
لاجل المسير ما يمر ويطوفك
يلفيك لامن شاف بالبيت خطار
.
والصاد صيدك لا يضيع بعجاجك
خل القناعه راس مالك وتاجك
.
وفي طاعة الرحمن فلة حجاجك
لا ترهق النفس الشقيه بالافكار
.
والضاد ضد الهم بالصبر لا طال
ترى همومك تالي الصبر تنزال
.
اصبر على ما جاك في كل الاحوال
تكسب اجر وتفوز لا صرت صبار
.
والطا طبايع خلق ربي تفاوت
لو كان في بعض الوصايف تساوت
.
رغباتها ما تستوى لو تخاوت
الا بحب المال في كل الاقطار
.
والظا ظنونك لا تخيب برفيقك
رفيقك اللي معك لاخر طريقك
.
احسن ظنونك لو بدى ما يضيقك
ترى الخوي يحتاج حشمه ومقدار
.
والعين عينك غضها لا تمشيت
ترتاح في ممشاك لا من تعديت
.
ترى النظر ممنوع لا من تمديت
لك نظرة وحده ولا فيه تكرار
.
والغين غادي من تشين بجاره
البر بالجيران ما هو خساره
.
حافظ على حاله وماله وعاره
ترى النبي وصى على سابع الجار
.
والفا فوادك اعمره بالمحبه
ترى الجفا والبغض للضيق سبه
.
والحقد خلقه في طريقك مطبه
سلم على من شفت يا طيب الكار
.
والقاف قف عند الامر والنواهي
لا تصير طول العمر داله وفاهي
.
ما يفهم المطلوب من كان ساهي
ما ينفع اللي طاح ترتيب الاعذار
.
والكاف كيف الراس شوف الطبيعه
لا ضقت روح للفجاج الوسيعه
.
واللي يبيعك لا زمنك تبيعه
ابعد عن اللي لا قضى حاجته بار
.
والام لم المشكلة بالتفاهم
وفي جمعة الاخوان حاول تساهم
.
ترى المجادل ما يفيدك يا فاهم
بكره يبين الحق والوقت دوار
.
والميم ميدان المراجل مشرع
للي عن الهفوات دايم تورع
.
اصبر وثبت خطوتك لا تسرع
ترى التسرع ميزته دايما ضار
.
والنون نوم الصبح ما منه مصلوح
السهر لامن طال ما هوب مسموح
.
لا تصير كنك جذع خاوي ومطروح
اسعى لكسب الرزق مع وقت الاسفار
.
والها هوى نفسك حذاري تجاريه
تتعب وتتحمل كثير المشاريه
.
درب الهوى والغي تتعب مساريه
وآخر مطافه منزل الذل والعار
.
والواو وقف مع ضميرك شويه
واستحضر النيات في كل شيه
.
خل الحساني تتيع الكل سيه
امح الخطا بالصح لو صار ما صار
.
واليا يقول المرشدي باخر القاف
زبدة كلامه عقب ما فكر وشاف
.
ترى حياة الضيم والذل تنعاف
والعاقبه للي عرف كيف يختار
.

عبدالله مرزوق المرشدي

.
المصدر: الملتقى الجماهيري للشاعر محمد بن فطيس المري