سعيد محمد القحطاني
ياسلام على الحضار والليل بادي// تحت ذا الكوكب اللي يفلج الليل نوره
اضبط اللعب ياقاصد وخل الدوادي// جابك الله ترا ذا الليل مافيه كوره
قاصد كريم
مرحبا ياسعيد وكني اليوم غادي
شفت بالحلم مقطعها بصوتٍ وصوره
ان بغيت الحوية وان بغيت الشدادي
مير كلن يناطح عن ذلوله وكوره
سعيد محمد القحطاني
سم بالله تراها ضحك والوضع عادي//لا تصدق ترا ماعاد مني خطوره
بس ودي أسالك حاجة في فوادي // وعطني الصدق والدعوى تراها مشوره
قاصد كريم
والله انك عزيز وفيه ملحٍ وزادي
بس انا خايف ان ابليس يعطيك دوره
احذرك الف مره ومرةٍ للمعادي
من يلوم الصديق اللي يخاف الخطوره
سعيد محمد القحطاني
انت جاوب وسؤالي وانت تعرف مرادي// كيف ضاع الخبر والناس ثارو بثوره
وبارك الله برجل من خطاه استفادي/// والاجابه ترا ماهي عليك ب ضروره
قاصد كريم
يعلم الغيب من يعلم خفايا العبادي
التزمت الحياد ولا تكشّفت عوره
يامدور حقيقتها بعلمٍ وكادي
انشد اللي يقشون الزبيدي بجذوره
سعيد محمد القحطاني
العرب مابقا الا يقدحون الزنادي///وانت باقي تقول ان الدروج محضوره
اشهد انك شمالي ماتجيب المنادي/: فار دمي ودمك جامد في قدوره*
قاصد كريم
يالله انك تسمح لي دروب الرشادي === قمحنا في سبلنا ماذرينا قشوره
ماتتبعت اثر ذيبٍ يحوف البلادي ==== دام ضاني بخير الله يكافي شروره
سعيد محمد القحطاني
كيف هالذئب ماتوه ذيابن عوادي// قد تعشى عشاه وخوفتي من فطوره
الله انه يخارج من نويا العبادي// الخفا والمخفا تضهره من جحوره
