06-19-2012, 11:09 PM
|
|
|
يالعتــيــبي مـن عـفـيــف الـى الكويــــــت
هذه القصيده أهداء من الشاعر سلطان القحطاني
الى الشيخ مطلق بن نايف المرشدي العتيبي
بعـد مـا ربـي بلانـي وابتليـت
احمـد الله والثنـاء لـه والشـكـر
خذت لي دوره على الارض ومشيت
وابتـداء مشـوار تشغيـل الفـكـر
وشـرّد الافكـار جتنـي كمبليـت
قالت اختار الجزيـل امـن الشعـر
قلـت هاتـي ماتهيّـا بيـت بـيـت
واسكبيهـا بالجـواهـر والــدرر
والله انـي بالهزيـلـه ماضـريـت
ارسم الابيات وانحت فـي صخـر
اه ياليـل(ن) علـى نـوره سريـت
ساري(ن) ليلي علـى نـور القمـر
واشتكـي للـي لغيـره ماشكـيـت
الله اللـي فـي يـده حـلَ الامـر
ماشكيته مـن فـراق اللـي بكيـت
وماشكيتـه مـن عنـاء والا فـقـر
اشتكي لاقالـوا ان سلطـان ميـت
وادخلونـي فـي مغاويـر القـبـر
وانتهيـت امـن الامانـي وابتديـت
فالسـؤال وفالحسـاب وفالنـشـر
وبعد شكّوايـه علـى ربـي نويـت
اتنشّـد عــن بعيـديـن النـظـر
الرجال اللي لهـم سمعـه وصيـت
الرجـال اهـل المواقـف والظفـر
وقمت اعـدّدّ فالطحاطيـح ولقيـت
شيخ قوم(ن) لاعتزاء داس الخطـر
يالعتيبي من عفيـف اليـا الكويـت
سمعتـك مثـل السحـاب المستمـر
في لزومـي والله انـي مانصيـت
مانصيت الا انـت ياحـزام الظهـر
بعت غيرك بالرخيصـه واشتريـت
معرفتـك وخوتـك تـاج وفـخـر
اعتليـت بقمـة الطيـب ورقـيـت
ماوصـل طيبـك لازيـد ولاعمـر
الطناخـه تنّتمـي لـك وانتمـيـت
للكرامـه والشجـاعـه والسـطّـر
مدّتك تغنـي وتشّبـع مـن عطيـت
فزعـة المضيـوم فاليـوم الغـبـر
اصغـر المـدّأت مفتـاح الونيـت
واكبـر المـدّات مفتـاح القـصـر
مثـل جنسـك يعلـم الله مـارأيـت
في وطـاء والا فضـاء والا بحـر
اسمك المطلق على الاسم استميـت
مطلق(ن) بيـن المشايـخ والجبـر
مرشـدي(ن) عنـد ظنـي لاهقيـت
لاكسـر عظـم المعـادي ماجـبـر
اخذ علمي بالموبايـل كيـت كيـت
ثـم خـط بتحتـه الخـط الحـمـر
وان فهمـت العلـم كلـه وانتهيـت
حـل وضعـي بالكـلام المختصـر
والنهايه لن سرحت ولـن ضويـت
ياصـلاة الله علـى خيـر البـشـر
الشاعر سلطان القحطاني
,
|
