الله يديم الغلا والمحبّة بالقلوب = والغلا ما هو بـ ( بِنق) ورسايل دردشه
والله إنّي يا أريش العين ماني بِمْغصوب = غير قلبي لا سمع صوتكم جاه ارْعَشَه
أرتعش من كلمة ( ألوه) يالريم اللعوب = وازهم اللي يرطن العود واصيح اخرشَه
قلتي أضمك على (الفيس) وتشوف (القروب ) = ومن عجبك من البِنيّ الحسان فقرّشَه
تضحكين وتعرفين الهواوي ما يتوب = قلبه بقلبك معلّق وحضنك مفرشَه
بالرياض وحاجته عندكم يا أهل الجنوب = أرحمو قلبه من العام يزداد اوحَشَه
أول الذكرى من العام في وقت الغروب = قلتي اسمع كلمتينٍ عليك منقّشَه
"المحبّه طعمها سكّرٍ في وسط كوب = كل ما تشرب حلاها تزيدك نعْنشَه"
لا قسم بإن المحبّه من كبار الذنوب = حسبي الله يالعيون الوساع المرمشَه
حبّك اللي يكوي القلب ويزيده شبوب = آه ليت القلب من قبل كيّه مِقلشَه

المصدر: الملتقى الجماهيري للشاعر محمد بن فطيس المري