كل عيبٍ له علاجٍ ماعدا عيب السكانه
لو تداوي لو تداري استحاله في علاجه
من تلبسته سكانه والله انه في مهانه
لو بذلت الجهد لاجله ظل حاله بعوجاجه
وان سترته مايجمّل باح سره في لسانه
وان نصحته زاد جهله وانكرش عند المواجه
علة صرمى ولاله في المراجل اي خانه
صيدة اللي مثل عرفه يشبهه في كل حاجه
يحسب انه يسكن الابراج ومحدٍ في مكانه
مادرى انه بظلمى والجهاله هي سراجه
واثق الخطوات واهم واهم ٍ عنتر زمانه
انه المغوار وغيره تحت انقاظ السذاجه
كل ماقلنا يتعلم كل ماسكر اذانه
لين صار اضحوكة اللي مايعرف الابتهاجه
لو تعوذ من شيطانه ماتعرض له شيطانه
ولا تهاوى وسط قاعٍ ماه مالح من هماجه
من تشبه بالحثاله ماترفّع قل شانه
ماكر الحر العلالي ماترده العجاجه
الاماني ماتمدّك وانت نايم باستعانه
من بغاها لازم انه يتحكم في مزاجه
واتباع الحق شرطٍ على من يبغا حصانه
سالم المنقود شهمٍ ماعرف درب اللجاجه
ولا يهمك من سفهته لو حسب فيها اهانه
دام ماقدر شعورك ماعليك من احتجاجه
