[شنق ونق]

ما قصدنا يا سعيد نجيب لك شكه ذميمه=ولا قصدنا نجرح المرضان بسنان السهامي
قصدنا سامي خذ اللب اللباب وضع يديمه=ما تعدينا لو ان خشومنا فيها عرامي
انت من نادا وحن جينا على صحن الوليمه=لا تشددنا قبل لا نعرف الفاظ الخصامي
رحمة الله فوقنا ونفوسنا ما هي رحيمه=والنعم بك والوفى لك يا ابن الاجواد استقامي
اسمي الموضوع ظاهر لو تفاكيرك سقيمه=ما شهرت الحد لجلك لا ولا ارويت الحسامي
دام انا من قوم رفعتها على الدنيا مقيمه=راسنا ما هو يلام وجارنا ما هو يضامي
يوم نفسي من فعايل بعض الاعضا جت كليمه=خل من فوقي اللثام وخل من فوقي الوسامي
وان عرفت اكون من تبقى علاقتنا حميمه=صرح وخل العرب تدري وانا ما ارضى اتهامي
شرعنا بكتاب رب الكون والسنه نقيمه=وعلمنا ما هو يظل ونورنا ماهو ظلامي
اشرع بضرب الفقاره والهوى ينفح نسيمه=وان بغيت العز لا تاكل سوا راس السنامي
دام نفسك في خفايا الناس ما جاتك عليمه=لا تثورك الشكوك ولا تعير لها اهتمامي
القصيمي ما يفرط يا رفيقي في قصيمه=والاوادم يا رفيقي ما تفرط فالنسامي
كل نار لها سناها كل دقه بتعليمه=يوم في كفي معاليق القضيه والزمامي
يا سعيد بروقنا لاحت ولا هي جوف غيمه=جوف نيات القلوب اللي تبادلنا السلامي