ماهي غريبه
ماهي غريبه تطعن بقلب مغليك.....
....لا والذي سواك ماهي غريبه
بس الغريبه قلب مغليك شاريك.....
....من فوق طعناتك يعدك حبيبه
في ذمتك بسئلك الله يجازيك.....
....عمرك رايت اجريح يعشق صويبه
شفت الغريبه يامعذب بغاليك....
....شفت المصيبه كيف ياهي مصيبه
رغم العذاب اللي جنيته من يديك....
.....قلبي يحبك يادواه وطبيبـــه
ورغم الدموع اللي بهالعين تبكيك....
....انت الوحيد اللي لـ شوفي قريبه
ورغم الالم والجرح وكثرت بلاويك..
...تبقى خوي القلب عطره وطيبه
يعني احبك حيل وموت انا فيك....
...واللي تبي تسويه سوه وجيبه
حتى لو ان الموت في راح كفيك...
...والله لـ ضمك مثل ضم الشطيبه
ياصاحبي بقولك شي وبقيك.....
...تفهم كلام اللي يعدك نصيبه
ماهي غريبه تطعن بقلب مغليك...
....لا والذي سواك ماهي غريبه
بس الغريبه قلب مغليك شاريك...
....من فوق طعناتك يعدك حبيبه
ثامر العنزي
