يالله ياللي تكشف الهم والضيق
يالواحد المعبود رب البريّة
أنت الرجا يالله لا ينشف الريق
دون المشيب ودون خط الوصيّة
يالله طلبتك ما طلبت المخاليق
ياكيف ابرجي خلق مثلي شقيّة
يالله انا ماجيت درب المطافيق
ولانيب انا ملزوم بأهل الرديّة
ياعالمٍ بالسر بوسط المعاليق
أستغفره من كل ذنب وخطيّة
الهم زاد وطوق الفكر تطويق
والقلب ضايق والمشاعر خفيّة
العمر راح وما بقى فيه توثيق
واللي مضى لاشك صعبٍ مجيّه
واللي بقى بالعمر جعله توافيق
من لحظتي يالله لين المنيّــــة
| توقيع : مــــهــرة عــتيبه |
|
